Sngewlyngoh naduh u snem 2012-13 ym don shuh ki samla Meghalaya ba pass IAS: Bah Hamlet

Shillong, Nailar 10 : U Chief Adviser jong u Myntri Rangbah ka Jylla, Bah Hamlet Dohling ha ka sngi Saitjaiñ u la ong ba haduh mynta ym tip shuh na kawei ka daw ba ka jylla naduh u snem 2012 – 13 ka khlem lah shuh ban sei ïa ki samla ba pass ïa ka Indian Administrative Service (IAS).
Ïa kane u la kren ha ka jingïalang pynkup burom ïa ki samla pule ba pass bha ha ka klas 10 bad klas 12 kaba la pynlong da National People’s Youth Front – Shillong City.
“Kumba long mynta haba ngi peit ha ka jylla jongngi, kiba pass ïa ka Indian Administrative Service (IAS) la slem bha ym don shuh ba pass IAS na ka jylla jongngi. Khatduh eh dei ha u snem 2012-13 ba ngi ïoh na ka jylla jongngi,” la ong u Bah Hamlet.
Shuh shuh u ong ruh ba kane ka dei ban pynlong ïa ki samla buh ka jingkylli kumno ba kat ka jingbun ki samla ba pass man u snem hynrei balei pat ka jylla kam don shuh ïa ki samla kiba pass ïa ka IAS ne kiwei pat ki eksam kiba heh ha ka Ri kum ka Indian Police Service (IPS) ki IFS ne IRS.
“Hynrei mynta, ka don bha ka jingkyrmen ha phi namar ka por ka dang don ïa phi lada phi don ka jingkut jingmut ban trei shitom bad aiti lut ban poi sha ka thong.”
U Bah Hamlet u ong ruh ba kum ki nongïalam ki kwah ban ïohi ba ha kawei ka sngi ki khun samla ka jylla kin don ha ki kyrdan kiba heh ban pynïaid ïa ka jylla kum ki ophisar rangbah.
“Ngi don ha Secretariat ngi ïohi ïa kata ka jingduna ïa ka jingdon ki briew na ka jylla jongngi ban bat ia ki kyrdan kiba heh ha ka sorkar,” u la ong.
Shuh shuh u ong ruh ba ki samla ki dei ban buh ïalade ka thong ba lada kiwei ki jylla jong ka Ri ki lah ban pynmih ïa ki IAS, IPS, IFS bad IRS balei ka Meghalaya kam lah.
“Kaba kongsan hi ka long ba ki samla ki dei ban kut jingmut bad don ïa ka thong,” u la ong da kaba bynrap ba ka jingpynlong jong ka NPYF Shillong City ia kane ka jingpynkup burom kadei shi bynta ban ai mynsiem ban pynrung ïa ka mynsiem ïakhun ha ki samla ka jylla.
Ha kane ka jingïalang pynkup burom ki la don haduh 70 ngut ki samla pule na kylleng ki shnong jong ka Shillong City kiba la shah pynkup burom namar ka jingpass bha jong ki ha kitei ki eksam.