Nongpoh, Nailar 27: U MLA ka Umroi u Bah Damanbait Lamare u la phah khubor sngewlem sha ka iing ka sem jong u Babu Tbn. EM Pyngrope u ba dei ruh u Principal ka Mynken Christian Higher Secondary School bad Tymmen basan ka Ba lang Presbyterian Umroi halor ka jingkhlad bad ka jingiehnoh jong u ïa baroh ki baieid ba thoiñ na kane ka sla pyrthei ha jaka sumar ha Apollo Hospital, Guwahati hadien ka jingshitom kaba la neh katto katne por.
Haba phah ïa ka kyrwoh na ka liang u Bah Damanbait Lamare MLA ka Umroi u la ong ba kum u nongmihkhmat ka thaiñ u dap da ka jingkyndit kaba khraw ban iohsngew ba u Babu Tbn EM Pyngrope um don shuh haka pyrthei namar ka jingban jong ka jingshitom haka met, bad ka jingkhlad noh jong u ka dei shisha ka jingduhnong kaba khraw ïa ka jylla namar udei uwei na ki riewkhmat u ba la nohsynñiang shibun sha ka imlang ka sahlang, ka pule ka puthi bad kiwei kiwei nalor ba u dei ruh u nongïalam ba kitkhia haka kam Ba lang, khamtam ïa ka iing ka sem.
Na ka liang ka u MLA u la phah ruh ka kyrwoh sngewlem ïa ka iing ka sem baroh kawei jong u Bah EM Pyngrope naduh ka lok bad ki khun ki kti, ryngkat ki jingduwai ba u Blei nongbuh nongthaw un pyntngen bad ri sumar ïa ka iing ka sem watla ki mad ïa ka jingkthang ka mynsiem halor ka jingduh noh ïa u rishot ba skhem jong ka iing.
