Shillong, Nailur 13: U MLA ka 19 South Shillong Constituency u Bah Sanbor Shullai u la pynpaw ïa ka jingsngewlem halor ka jingkhlad noh ba kyndit jong u MDC ka Nongthymmai u Bah Heh Latiplang Kharkongor uba la long ruh kum u MDC la kumba 4 samoi treikam jong u.
Ha ka kyrwoh khubor u Bah Shullai u la ong ba u Bah Heh u dei u briew uba stad, u nongïalam bad u nongïada u dei ruh u He Man uba shi sur shi dur bad uba beit ha ki rukom treikam bad u dei ruh u briew uba shlur bad u bym tieng ïa kano kano ka jingeh kaba wan hakhmat. “U dei u kpa jong kiba duk kiba donkam ki jingïarap bad ki briew kiba tlot ha ka ïoh ka kot. U Blei u la tip ïa ka jingeh jingjynjar jong u Bah Heh bad dei halor kane ba U Blei um kwah ba phin shem jynjar bad kumta na ka liang jong nga bad ka ïing ka sem jong nga ngi pynpaw ïa ka jingsngewlem ïa ka jingkhlad noh u Bah Heh Latiplang Kharkongor bad ki paidbah kin ym klet satia ïa ki matti jong phi kiba phi la bet ha kane ka ri ba ieid jong ngi,” ong ka kyrwoh na u Bah Sanbor Shullai.
