Sngewlem ka SAFF ïa ki lanot hap liengsuiñ bad ki lanot shah pynïap ha ki jaka jngohkai

Shillong, Jylliew 17 : Ka Shillong All Faiths Forum (SAFF) ka la phah ka jingsngewlem halor ka jingkhlad noh jong ki nongleit jingleit ha ka jinghap ka liengsuiñ Air India ha Ahmedabad dang shen kaba kylla long ka jinghap liengsuin kaba shyrkhei tam ha ka Ri.
Ha kajuh ka por, ka SAFF ka la phah ruh ka jingsngewlem bad ki bahaiing ha sem jong ki lanot kiba la ngat ha ka jingjia shah pynïap jong ki paidbah ha kylleng ki jaka jngohkai pyrthei kiba don ha ka Ri.
“Ki kam ba shyrkhei kiba la leh ha Pahalgam bad ruh ha Sohra ka pyni ïa ka jinglong jong kito ki briew kiba bteng ban pynjah burom bad pynthut ïa ka suk ka sain ha ka imlang sahlang,” ong ka SAFF ha ka kyrwoh.
Ka SAFF ka la pynpaw ruh ïa ka jingsngewnguh kaba khraw sha ki paidbah ka thaiñ Sohra khamtam ïa ki nongïalam lynti ïa ki nongjngohkai pyrthei, nangta ïa ka sorkar bad ki pulit ka jylla na ka bynta ka jingtrei shitom ba khlem sangeh ban sei madan ïa ka jingshisha baroh.