Shillong, Naitung 29 : Ka Executive Committee jong ka Meghalaya State Olympic Association (MSOA) ha ka sngi Thohdieng ka la pynlong ka jingïalang sngewlem ka jingkhlad noh u Bah RG Lyngdoh Working President barim bad Adviser jong ka MSOA.
Ha katei ka jingïalang la pynlong ruh ka jingsngap jar ba shi minit kum ka dak ka jingburom ïa Bah RG Lyngdoh uba dei u nongïalam ba radbah jong ka MSOA.
Ha ka kyrwoh khubor, ka MSOA ka la pynkynmaw ba dei ka jingtrei shitom jong u Bah RG Lyngdoh ha kaban wanrah ïa ka Sports & Youth Polisi. “Ka jingshakri jong u (Bah RG Lyngdoh) ïa ki paidbah ha ka liang ki kam ïalehkai hapoh ka jylla yn ïai kynmaw junom,” ong ka kyrwoh khubor.
“Hapdeng ka khyllipmat jong ka jingwan kah u lyoh badum, na ka liang ka MSOA ngi phah ka jingsngewlem sha baroh kiba haïing hasem bad ngi duwai ba U Blei Trai Kynrad Un pynshait bor bad pyntngen ïa ka ïing ka sem,” ong ka kyrwoh khubor lyngba u Bah Finely Pariat, General Secretary ka MSOA.
