Sngewlem ka MRCTA halor ka jingkhlad noh u Prof Sarkar, uwei na ki nongseng ka kynhun

Shillong, Naitung : Ka Meghalaya Retired College Teachers Association (MRCTA) ka la pynpaw ka jingsngew kyndit ka ba khraw halor ka jingkhlad noh jong uwei na ki nongseng jong ka kynhun, u Prof. Nirmal Kr. Sarkar 77 snem rta u ba dei ruh u Vice Principal barim jong ka Shillong College u ba la khlad noh ha ka 8 tarik mynta u bnai hapoh Nazareth Hospital, Shillong hadien ba ka jingshitom ka la ban ïa u lah kham slem.
ïa u Prof. Sarkar la kha ha ka snem 1945, bad u la pynïasoh bad ka Shillong College ha ka 21 tarik u Naitung 1969 kum u lecturer ha ka English bad u la shongthait ha ka 28 tarik u Rymphang 2005, kum u Vice Principal jong kane ka institute.
U dei u briew u ba pawkhmat shibun bad u ba don ka jingsngewtynnad bad ki khynnah pule, nalor kata u la don bynta ruh ha ki ba bun ki jingtreikam na ka bynta ka imlang ka sahlang bad ki kynhun seng ki ba khmih halor ka jingpynneh ïa ki kolshor, kata wat hadien ba u la shongthait tad haduh ba un da khlad noh.
Kumta na ka liang ka MRCTA ka phah ruh ka jingsngewlem sha ki ba haïing hasem jong une u rangbah ba la khlad noh khamtam na ka bynta ka kurim jong u, ka Roma Sarkar ka ba dei ka Head barim jong ka Department of Botany, Shillong College bad ruh na ka bynta ki arngut ki khun shynrang jong u.Kane ka long katkum u kyrwoh lyngba u Bah H.Syiem, General Secretary MRCTA.