Sngewlem ka MFA & SSA ïa ka jingkhlad noh u Bah SS Rapthap, u rangbah ba kyntiew ïa ka phutbol ha Meghalaya

Shillong, Lber 03: Ka phutbol Meghalaya ka dap da ka jingsngewsih kaba khraw halor ka jingkhlad noh jong u wei na ki radbah ba kyntiew ïa ka phutbol ha Meghalaya, u Bah SS Rapthap, uba la khlad noh ha ka janmiet sngi Saitjaiñ.

U Bah SS Rapthap, uba la ju tip bha kum u Heprit, u dei u General Secretary barim jong baroh ar tylli ki synjuk ïalehkai jong ka Shillong Sports Association bad ka Meghalaya Football Association bad u dei ruh uwei na ki Vice-President jong ka SSA ha ka por ba u la khlad noh.

U nongshong shnong ka Mawkhar, une u rangbah uba la 68 snem ka rta u la shakri ruh ïa ka Mawkhar Sports Club bad dang shen u la long kum u Adviser.

Ha ka khubor sngewlem sha kiba haïing hasem, u General Secretary ka MFA u Sunesh Syiem u la ong ba ka synjuk ka dap da ka jingsngewsih halor ka jingkhlad noh jong u Bah SS Rapthap. “Ka jingsngew lem ka leit sha ka longïing ha kane ka por kaba sngewsih.”

U la bynrap, “Yn kynmaw ruh ïa u Bah Heprit na ka bynta ka jinglong jai jai jong u bad ka jingsbun. Ngin kynmaw ruh ïa u na ka bynta ki kam jong u ha kine ki snem kiba bun, na bynta ka jingroi bad ka jingkyntiew ïa ka phutbol ha Shillong bad ha ka Jylla Meghalaya baroh kawei. Ngi kynmaw ruh ïa ki jingjia bad ki por kiba Ngi la mad ryngkat lang.”

Katba na ka liang jong ka Shillong Sport Association (SSA) ka la pynlong ïa ka jingïalang sngewlem mynta ka janmiet por 3.45 pm ha ophis jongka SSA ha Polo hapoh ka jingïalam jong u President bah Banteidor Lyngdoh ha kab la pynpaw ka jingsngewsih kaba khraw halor ka jingkhlad noh ba kyndit jong u Senior Vice President jongka u bah S.S Rapthap uba ju khot ieit kum u Bah Heprit ba shong ba sah ha Mawkhar, Shillong ha ka 1 tarik Rymphang 2025. Ka SSA ka pynpaw ba ka jingkhlad noh jong une u radbah uba shim khia ban kyntiew ïa ka jingïalehkai phutbol ha ka jylla ka long ka jingduh ba khraw ym tang ïa ka SSA hynrei ïa ka jylla hi baroh kawei. U long da shisha u paia ba khlaiñ bor jongka SSA.

Ha kane ka jingïalang la ïadon lang Working Presideent, Vice President, General Secretary, Treasurer bad ki Council Member. La ai jingkren da kiba bun ki dkhot ha kane ka jingïalang sngemlem kiba la pynpaw ïa kajuh ka sur ba sngewsih ba ka jingkhlad noh jong une u riew rangbah ka la long ka jingduh kaba khraw ïa SSA bad ka jylla hi baroh kawei. Ka SSA ka phah ruh ka jingsngewlem sha ka ïing ka sem, ki khun ki kti jong Bah Heprit halor kane ka jingïakynduh ïa kane ka jingjia ba sngewsih bad duwai ba U Blei  un ai ka jaka shong jahthait ïa ka mynsiem jongu junom la junom.

La pynlong ruh ïa ka jingsngap jar kaba shi minit shwa ban sdang ïa ka jingïalehkai jong ka lympung Shillong Premier League bad ka SSA ka la rai ban pynsangeh ïa ka jingïalehkai ban long mynta ka sngi, sha ka tarik kaba hadien kum ka dak jong ka jingburom bad ban pynlah ïa ki nongïalehkai, ki nongpynïaid, ki coach bad kiwei kiwei ban wan sha ka jingleit ontep, ka ban long naduh ka por 12 baje mynsngi ha ka 4. 3. 2025.