Sngewlem ka KSU ïa uba khlad na ka aksiden ha Mawsynram

Mawkyrwat, ‘Nailar, 16: Ka Khasi Student’s Union (KSU) jong ka South West Khasi Hills District ha ka kyrwoh na u samla Denishan Iawrod, Assistant Organising Secretary KSU South West Khasi Hills District ka pynpaw ïa ka jingsngewsih bad ka phah ruh ïa ka kyrwoh sngewlem sha ka ïing ka sem jong u bah Nidayophi Dkhar uba la khlad noh hadien ba ka trok kit Cement ba u la ñiah ka la hap ha ka riat ba jrong kumba 200 phut ei ei ha shnong Mawsynram hajan kawei ka jaka ba marjan bad ka Krem Mawjymbuiñ.
Kane ka jingjia ba sngewsih ka la jia ha ka step sngi saitjaiñ jong ka 13/08/2022 ha ka por kumba 8 ne 9 baje mynstep. Ha kane ka jingjia ka la pynlong ïa ki samla na ka shnong Mawsynram, ki dkhot ka seng, ka kynhun SDRF bad ki nongshong shnong jong ka Shnong Wapung ban wan ban ïa wad ïa une u nongñiah khnang ban ïoh sei ïa u na ka jingtap jong kane ka trok kit cement kat haduh ban da lap ïa u hynnin ka sngi 15 tarik mynta u bnai.
Ka seng KSU ka phah ïa ka kyrwoh sngewlem sha kane ka longïing ba la duh ïa une u rangbah ha kane ka jingjia ba sngewsih bad kumjuh ruh ka phah ïa ka jingkitbok kitrwiang ruh ïa u nongbud jong kane ka trok ba la mynsaw bad don ha jaka sumar.
Shuh shuh ka seng ka sngewdei ban kynthoh ruh ba kum kane ka jingjia ka la jia dei namar ka jingtorti jong u kontraktor ba maramot ïa kane ka surok ha kaba u la shu pyndap da ki byrni ba la pyndap tang da ka khyndew ha ka jaka ban kynroh da ki maw ha kane ka jaka ba la twa bad kum ka seng ka shim ba kane ka dei ruh ka jingpyntrei torti jong ka ophis PWD (R) Mawsynram Division. Kawei ruh ka daw ba ka seng ka la lap ka long ba ka dei ka jingrit palat jong ka surok ha shilynter naduh Weiloi haduh Mawsynram bad Ranikor ha kaba kum ka seng ka sngew ba ka sorkar ka dei ban phai khmat ban shna bad pynheh ïa shilynter kane ka surok khnang ba kan pynshngaiñ ïa ki nongleit nongwan khamtam haba ka dei ka surok kaba da ki spah tylli ki kali ki ïaid ha ka shisngi bad ruh ka dei ruh ka jaka ba riat kaba lada don ka jingjia hap kali ne aksiden khlem artatien kan wanrah beit ïa ki jingjia ba sngewsih kumba la jia ïa une u rangbah ba la duh ei ïa la ka jingim.
“Ka seng ka dawa ba dei ban phah maramot noh mardor ha ka rukom kaba paka ïa baroh ki jaka ba don jingtwa, ban pynheh ïa ki jaka ba kham khim ha shilynter ka surok naduh Weiloi, Mawsynram, Balat bad Ranikor. Ngi dawa ruh ïa ki nongmihmat naduh ki MLA bad MDC jong ka Mawsynram Constituency bad Ranikor Constituency ba kin phai khmat lem halor kane ka bynta ban pynheh ïa kane ka surok khnang ba kiba kum kine ki jingjia kin nym jia shuh nangne shakhmat”, ong ka kyrwoh na ka seng KSU.
Ka seng ka ai khublei ïa ki nongshong shnong ka Mawsynram, ïa ki dkhot ka KSU Mawsynram Unit bad ïa kiwei kiwei kiba la shimkhia ban ïa wad ïa u rangbah ba la khlad bad ban ïarap lem ïa u nongbud kane ka trok ban pynpoi sha ka jaka ban sumar.