Sngewlem ka KSU ïa ki bahaïing jong ki 6 ngut kiba khladnoh ha ka jinghap kali ha riat Wah Sohkhlur

Shillong, Jylliew, 18: Ka Khasi Students’ Union Southwest Khasi Hills District kam lah khlem da pynpaw ïa ka jingsngewsih halor kaei kaba la jia ïa ki paradoh parasnam jong ngi bad ka phah ruh ïa ka kyrwoh sngewlem sha ki iing ki sem jong u Bah Shanborlin Sohtun, kong Edwin Sohtun, Bah Atiar Bilansel, Bah Defender Bonni, kong Gracefully jyrwieh bad i wei i khunlung badang 2 snem kiba la mad ïa ka jingjia ba sngewsih ha kaba ka kali ba ki shong ka Bolero Camper ka thmu ban leit phai noh sha shnong Thieddieng ka la hap noh ha riat bah kaba don ha surok ban leit sha Thieddieng sharum Mawsynram. Kane ka jingjia ba sngewsih ka la jia ha ka 13 tarik Jylliew 2023.
Ka seng ka phah ïa ka kyrwoh sngewlem sha ki ba ha iing ha sem jong kine ki 6ngut kiba la mat ïa kane ka jingjia ba sngewsih kaba lehse ngi lah ban ong ba ka la mih tang na ka daw ka jingsniew ha ka surok ryngkat bad ka jinglong jong ka Mariang ha kine ki sngi.
Ka seng ka kyntu namar kata ïa ka tnad PWD ( Roads) bad ïa ki bor sorkar bad kumjuh ruh ïa ki bor District ba ki dei ban shimkhia halor ka shilynter jong kane ka surok khnang ban pyllait na ki jingjia ba sngewsih nangne shakhmat da kaba pynbha noh mardor ïa katei ka surok ka ban long ka jingshngaiñ bad ka jing-myntoi ha ka ïaid ka ieng ïa ki paidbah nongshong shnong jong katei ka thaiñ, ong u kyrwoh ba la phah da u Publicity Secretary KSU South West Khasi Hills District u samla Macdonald Marbaniang.