Nongpoh, Ïaiong 21: Ka Dorbar ki Rangbah shnong lyngba u Bah BB Makdoh bad u Bah PB Sylliang mynta ka sngi kila phah ïaka khubor sngewlem sha ki bahaiing hasem jong u Bah JD Rymbai (bam kwai ha dwar u Blei) u ba la khlad noh haka 21 tarik mynta u bnai.
Kum ban shu pynpaw ba u Bah JD Rymbai u dei ruh u MLA ka barim ka Jirang Constituency bala long teng ruh u Myntri Rangbah barim ka jylla, u Lamphang bad u Myntri sorkar barim ka jylla haki snem bala leit noh.
Naka liang u Bah BB Makdoh Chairman ka Dorbar ki Rangbah shnong u la pynpaw ka jingkyndit ban iohsngew ba u JD Rymbai um don shuh haka pyrthei namar ka jingban jong ka jingshitom haka met, bad kajingkhlad noh jong u Bah JD Rymbai ka dei shisha ka jingduhnong kaba khraw ïaka jylla namar udei uwei naki riewkhmat u ba la nohsynñiang shibun sha ka imlang ka sahlang bad ka jylla baroh kawei.
Naka liang ka Dorbar ka phah ruh ka kyrwoh sngewlem ïaka iing ka sem baroh kawei jong u Bah JD Rymbai naduh ka lok bad ki khun ki kti, ryngkat ki jingduwai ba u Blei nongbuh nongthaw un pyntngen bad ri sumar ïaka iing ka sem watla ki mad ïaka jingkthang ka mynsiem halor ka jingduh noh ïa u rishot ba skhem jong ka iing.
