Shillong, Naiwieng 17 : Hadien ba ka MPSC ka la dep ban pynlong ïa ki interview bad jied ïa ki samla kiba la pass bha ïa ka interview ban thung ha ka kyrdan Grade III hapoh ka tnad ba dei peit ïa ka rep ka riang jongka jylla ( Agriculture and Horticulture) ha ka 15 tarik mynta u bnai kane ka tnad ka la ïoh ban thung haduh 83 ngut ki samla ha ki kyrdan Agriculture bad Horticulture Development Officer sha baroh 12 tylli ki district jongka jylla.
Kane ka jingïoh ïa kine ki ophisar ba thymmai ka la ïarap bha ïa ka tnad Agriculture bad Horticulture ban pynsted ïa ki kam ban shakri ïa ki paidbah namar baroh shi katta ka don ka jingud jingnam na ki bor pynïaid kane ka tnad ba ka duna palat ki nongtrei bad ka kham suki ka jingshakri ïaki paid nongrep.
Haba ïakren bad u Myntri ba dei peit ïa kane ka tnad ka rep ka riang u bah Banteidor Lyngdoh uba dei u MLA ka Mawkynrew Constituency halor ka jingïoh ban thung noh ïakine ki 83 ngut ki ophisar hapoh ka tnad ula pynpaw ka jingsngewkmen kaba khraw ba la lah ban pyndep ïa kane ka kam hapoh ka por jongu. U la ong “ Kane ka dei ka kam kaba nga la sdang bad tynruh naduh u snem 2018 hynrei namar ba wan noh ka khlam ha u 2019 kumta kane ka kam ka la suki noh. Hynrei wat la katta ruh nga sngewnguh ïa ka MPSC kaba la pyndep ïa ka kam ban interview bad phah ïa ki list jong kiba pass sha ka tnad khnang ban ïoh thung ïa ki bad mynta ngi la ïoh ban thung ïa baroh kine ki 83 ngut. Kane kan ïarap ïa ka tnad ban dang lah ban ai ka jingshakri kaba kham biang shuh shuh sha ki paid nongrep haba ki wan wad ki jingïarap na ki ophis la ka dei hangne ha nongbah Shillong ne sha ki district bapher bapher”.
U la ong “ Hadien ba nga la shimti nga lap ba ka don ka jingduna jong ki nongtrei hapoh ka tnad ka rep ka riang bad dei na kane ka daw ba nga la shim khia ban bud dien na ka bynta bad khot aplikeshon ban thep kam ki samla ha kine ki kam ba lait. Kumta la aiti sha ka MPSC bad kala pyndep ïa kaba donkam baroh bad mynta la lah ban thung ïa kine ki 83 ngut ki samla Khasi Jaintia bad Garo. Kane ym tang ba ka ïarap ïa ka tnad ka ka rep ka riang hynrei ka la ïarap ban pynïoh kam ïa kine ki samla ruh mynta”.
