Shillong, Lber 28: U Lat jong ka jylla u Satya Pal Malik ha ka Sngi U Blei u la leit ban ïa shim bynta sha ka jingïalang bala pynlong da ka Lyngpung Seng Khihlang ha shnong Swer.
Ha ka jingkren u la ong ba ka long kaba ïoh mynsiem bad sngewkmen ban ïohi ba ka Seng Khasi ka ïaleh ban pynneh pynsah ïa la ka jong ka Riti ka Dustur bad u la ai ka jingkitbok halor kane.
Ka Seng Khasi ka juh pynlong ïa kane ka jingïakynduh lang ba shisien shisnem jong ka seng Khihlang bad kane ka long kum ka jingïakyduh jong ki seng samla ka seng khasi, ha kum kane ka sngi da ki hajar ki khun samla kila ïa poi sha kane ka jingïalang.
Ha kane ka sngi la pyninam ruh ïa ki riam tynrai bad ki rukom shad tynrai na ki shnong bapher bapher jong ka Ri Khasi Jaintia. Ki la don bun tylli ki shad tynrai bad ki riam tynrai kat kum ki riti dustur u khun khasi khara na ka Bri u Hynniewtrep.
Ki riew rangbah ki long san jong ka Seng Khasi ki la ïa don lang ban sakhi ïa kane ka sngi bad ha kane ka sngi ki nongkren ki la la sneng la kraw kumno ban pynneh pynsah ïa la ka ka jong ka Riti Dustur kaba la ïoh pateng naduh kulong kumah bad ban pynneh pynsah pateng la pateng.
La synran ïa u Lat ha katei ka lympung da u MLA jong ka Sohra u bah Gavin Miguel Mylliem, Bah Samlin Malngniang MLA Sohiong, Bah Wailad Shylla MLA Jowai. Kane ka jingïalang ba ar sngi kala sdang ha ka 26 tarik Sngi Saitjaiñ bad la pynkut ha ka Sngi U Blei.
