SHILLONG, Nailar 28: Ka Meghalaya Football Association (MFA) ka la ai khublei ïa ka kynhun ki khynnah ïalehkai Under-15 ka Meghalaya ba la mihkhmat da ka Nongjri Presbyterian Secondary School kaba la long ka lahduh ha ka U-15 International Subroto Cup 2024 hadien ba jop ïa ka final.
Kane ka jingjop ka ïeng kum ka jingpynshisha ïa ka jingaiti, ka sap bad ka jingtrei shitom jong ki nongialehkai bad ki nonghikai.
Ka jinglah ban ïalehkai bha jong ka kynhun naduh ba sdang ka lympung ka la wanrah nam bad burom ïa ka Jylla bad ka la pyni ïa ka sap ba kyrpang ba kane ka Nongjri Presbyterian Secondary School ka la sei.
Ngi ithuh ïa ka jingkyrshan kaba kongsan na ki bor pynïaid jong ka skul bad ïa ka jingai mynsiem kaba khlem sangeh jong ki kmie ki kpa, kiba baroh ki la don ka bynta ha kane ka jingjop.
“Sa shi sien pat Ngi ai khublei ïa ka jingjop kaba ka kynhun ka dei hok ban ïoh. Ngi khmih lynti ban ïoh lehkmen khambun ki jingjop ha ki por ban wan.
Haba phai sha ka jingïakhun ïa ka final, ka Nongiri Presbyterian Secondary School ka la pynliem suk da 3-0 kol ïa ka Major Dhyanchand Sports College, Uttar Pradesh ban rah ïa ka namlahduh.
