Nongpoh, Naiwieng 27 : Ka sorkar ka la shu pynlut phut pyn syrwa kai bad pyn donkam bakla ïa ka pisa jong ki paidbah, da kaba shu thung kam ïa ki briew la jong tang ban neh ha ka shuki da kaba shu thung kam ïa ki briew kiba don ka jing ïadei saiñ pyrthei da kaba shu thung kam kum ki chairman, co-chairman, vice chairman, deputy chairman, ki adviser, ki consultant bad ka jing thung kam ïa ki ophisar ba la dep shong thait na ka kam.
Kum ki officers on special duty ha ki commission, ki corporations ki committee ki department bapher bapher ha ka jing siew tulop kaba heh bad ki wei ki wei ki jing myntoi ba man u bnai (salaries allowances and other perks ) kane baroh ka dei tang ka jing myntoi ha ki kam saiñ pyrthei ym na ka bynta ki paidbah, kane ka dei tang ka buit ban myntoi ki katto kiba don ha ka bor synshar tang ban neh shuki ban lait khyllem ka sorkar, katba ïa ki nongtrei ba rit kum ki nonghikai skul, ki asha, ki aganwadi, ki muster roll, ki nongbylla, ki nongrep, ki nongïaleh kai sport bad ki samla bym ioh kam, kane ka sorkar ka la kheiñ dewthala bad la shu leh klet ïa ka hok bad ki jing dawa jong ki na ka por sha ka por bunsien ka sorkar jylla ka ong ba ym don pisa.
Shuh shuh, u la pynpaw ba ka sorkar jylla ka la shu pyn lut phut pyn syrwa kai bad pyn donkam bakla ïa ka pisa jong ki paidbah ha ki wei pat ki kam sngew bha, ha ki tamasa bapher bapher kum ka cherry blossom festival bad ki wei ki wei ki bym ai jingmyntoi ïa ki paidbah nong shong shnong ka jylla katba ka sorkar jylla ka pynlut pisa da ki klur tyngka bad ki phew klur bad ki nong shim bynta ha kum ki ne ki tamasa ki dei tang ki heh spah ba wan na bar bad katto katne ki heh spah ka jylla, lada ka sorkar jylla ka pyndonkam hok ïa ka pisa jong ki paidbah ka jylla hi baroh ka wei kan kiew ha ki liang baroh, kane ka long katkum ka kyrwoh na u Samla Albert Maring naka shnong Umdap Dumu, Ri-Bhoi District.
