Sngewkhia u MDC ba suki pyntreikam ïa ka soskular ANVC kyntu khot jingïalang ïa ka sorkar

Shillong, Rymphang 1 : U MDC ka BJP na Tura Constituency u Bernard N Marak u la pynpaw ka jingsngewkhia jur halor ka jingsuki jongka sorkar ban pyntreikam ïa ka soskular ne ka Agreed Text bad halor kane u la kyntu ïa ka sorkar ban khot noh da ka jingïalang ba kyrkieh ban ïakren halor kane ka kam.
Ha ka shithi ba u la phah sha u Symbud Myntri Rangbah ba dei peit ïa ka tnad kam pohïing u bah Prestone Tynsong, u Marak u la kdew ïa ki mat kiba ktah ïa ka ri lum Garo kiba kynthup naduh ka jingtih maw beaiñ, ka jingwan rung ki mynder bad ka jingdie pathar ïa ki jaka puta.
“ Kumta ka jingpynslem ban shim khia halor kine ki mat ka kdew ba ka sorkar kam sngewkhia ei ei na ka bynta ki paid nongshong shnong ka ri lum Garo” ong u Marak.
U la ong ha ka jingïalang la dep kular ba dei ban khot ïa ka jingialang man la ka arbnai bad ban thung ruh ïa u Nodal Officer, ban bishar bniah ïa ki jingïarap ba dei ban ai sha ki dkhot ka ANVC bad ANVC B kiba la wan pyndem bad ban thaw ruh ïa ki district committee hynrei haduh mynta ïa kine ym pat leh ei ei ruh.
“ Ngi la shu ïai shah bad kwah ban ïakren pynbeit halor kane hynrei wat hadien ba la khot ïa ka jingïalang ha u Naiwieng 2025 ruh ym pat treikam satia. ïa ki rai ba la shim ha ka jingïalang la bun kiba pyndam wat la ka jingïalang ka neh haduh lai kynta tam kaba la long ha ka 26 tarik Nailur 2025.
U la pynpaw ruh ka jingsngewkhia jur halor ka jingjyllei ka jingtih maw beaiñ ha ri lum Garo bad khamtam ka jingwan rung ki mynder na khappud sha kitei ki jaka ba tih maw beaiñ.
“ Kine ki jingtih maw beaiñ ka la khring ïa ki mynder ban wan rung jubor na khappud kaba la wanrah wat ka jingiap jong u samla ha Rajabala dang shen” ong u Marak.
U la pynpaw ka jingsngew bynniaw ba wat hadien ba la ujor ejahar ruh ki bor pulit bad synshar district kim shym la shim khia ban thwet ïa ki briew kiba donkti. Kane ka jingbym shim khia ka la pynshlur ïa ki mynder ban wan rung jubor bad leh ïaki kam khaïi beaiñ. U la maham ba ka jingbyrngem ka ISIS -K ka dei kaba ma bad donkam ba ka sorkar kan tohkit bniah ban lap mano ba donkti namar kane ka dei ka jingma kaba ap ia ka ri lum Garo.
U la kynthoh jur halor ka jingpyntreikam ïa ka Assam Land Regulation Act ha ri lum Garo da kaba ong ba kane kam dei ka rukom bad ka dei ka jingma ba ap ïaki trai ri trai muluk ha ri lum Garo. “ Nga sngewkhia halor ka jingpyntreikam ïa ka Assam Land Regulation Act (Assam Shedule ha ri lum Garo bad ka jingai pata thur mur jongka GHADC sha ki bym dei Garo ha ki jaka thor jongka. U la ong kane ka la wanrah ka jingbym ïasngewthuh jingmut para briew kiba sah ha katei ka thaiñ namar ki bym dei riewlum ki kam ba ki dei ki riewlum. U la ong ba ha ka por ba phiah ïa ka East Pakistan ne ka Bangladesh ki phet wir ki sah ha ri lum Garo kata ha kitei ki jaka thor hynrei ym shym la ai jaka satia ba kin long trai namar katei ka jaka ka hap ha ka Sixth Schedule.
Hynrei khlem kino kino ki rai ne jingpynbna la pyntreikam da ka Assam Land Regulation Act mynta la kumba 70 snem ei ei bad kane ka la ktah jur ïa ki paid Garo namar ïa ki jaka puta la ïoh ban long trai da ma ki bad kane ka la ktah jur ïa ki hok long trai jong ki paid Garo. U la maham ruh ba lada ym shim khia ïa kane wat ka Assam ruh ka lah ban kam trai ia kitei ki jaka kumta u dawa ba ka sorkar ka dei ban pynbeit noh mardor ïa kane ka kam shwa ba ka por kan dier.
Kumta u la dawa ba dei ban khot kyrkieh ïa ka State Level Review Meeting khlem da pynslem shuh ban pynbeit iakine ki mat ba ktah ïa ki paid Garo.