Sngewkhia u Lamphang ka ïingdorbar ba kyrduh Doktor ha Meghalaya

Shillong, Jymmang, 27: U Lamphang jong ka Ingdorbar Thawaiñ ka Jylla u Bah Metbah Lyngdoh u la pynpaw ïa ka jingsngewkhia halor ka jingkyrduh doktor ha kane ka Jylla Meghalaya watla u la pynpaw ba haduh mynta ki don haduh 600 ngut ki doktor kiba shakri ha kylleng ki jaka ai jingsumar jong ka Jylla.
Ïa kane u Bah Metbah u la pynpaw ha ka 22nd Scientific Conference cum General Body Meeting jong ka Meghalaya Medical Services Association (MMSA) ha ka sngi Thohdieng kaba la long ha State Convention Center.
Ka phang rakhe jong kane ka sngi ka long, “Medical Professionals: Health and Wellness.”
Haba kdew ïa ka jingai jingkheiñ da ka World Health Organization (WHO), kaba pyni ba uwei u doktor un sumar na ka bynta shi hajar ngut ki nongpang, u la ong, ha Meghalaya uwei u doktor u la hap ban ai jingsumar kumba 5,500 (antad) ïa ki nongshong shnong.
“Ka thong, bad ka jingthmu jong kane ka kynhun ka long ba dei ban wan lang kawei khnang ban pynthikna ba ngin dup lah ban ïakhun ïa ka jingduna jong ki doktor ha ka jylla jong ngi,” ong u Bah Metbah.
U Myntri ka tnat ka Koit ka Khiah u James PK Sangma haba kren kum u Symbud Kongsan u la ïaroh ïa u synñiang u bynhei jong ki nongtrei ka tnat ka Koit ka Khiah kiba la trei shitom ban ïa ka jingshakri kaba paka sha ki nongshong shnong jong ka jylla.
“Phin sngewkmen ban tip ba ka Sorkar ka la trei shitom ban pynurlong ïa ka State Mental Health Policy,” ong u James.
Ha kawei pat ka liang u Myntri u la ong ba ka Jylla ka ju kham phaikhmat ban pynduna ïa ka jingïap khlem dei por jong ki longkmie kiba pun khun lane ka Maternal Mortality Rate (MMR) bad ïa ka jingïap jong ki khunlung ba dang shu kha lane ka Infant Mortality Rate (IMR).
“Nga ladep pynpaw ïa kane ha ki jingïalang ba ladep mynba nga la leit ïashim bynta ha ka jingïalang kaba la long ha Gujarat ha ka jingïalang jong ki Myntri ka tnat ka Koit ka Khiah jong ka ri ba ngi kwah ban pynduna haduh katta katta ïa kine ki jingjia. Nga ngeit ba kum ki nongtrei kiba la tbit jong ka Sorkar, ban duhei ïa kawei ka mynsiem jong ka kmie lane jong i khunlung ka long ka bym lah satia ban pdiang,” u la ong.
Ha kane ka sngi, la pyllait paidbah ruh ïa ka Souvenir jong ka MMSA.
Ka President jong ka MSSA ka Y.A Phira ka la pynpaw ba ki doktor kiba shakri ha ki jaka ai jingsumar bapher bapher jong ka Jylla ki la aiti lut met bad mynsiem ban shakri katkum ki jingdonkam jong ki paidbah.
Ka la pynpaw ruh ïa ki jingeh bad ki jingshah tynjuh ha kiba bun ki liang bad ong ruh ba ki dkhot jong ka MMSA kiba trei sha ki jaka nongkyndong kiba jngai ki dei ban ïoh ïa ka jingithuh na ka Sorkar Jylla.