Sngewkhia u Conrad ba jur ka jingpynïapait bad wanrah jingsngewïapher ha ki rynsan social media

Shillong, K’Lyngkot 21 : Ka Meghalaya ka la kiew stet bha ha kine ki hynñiew bad phra snem mynta haduh ba ka la kot kumba 10 persen ka jingkiew ha kine ki lai snem mynta haduh ba ka la paw kum kawei na ki jylla kiba kiew stet ha ha ka Ri baroh kawei, ong u Myntri Rangbah ka Jylla Conrad K Sangma.
Ia kane u Myntri Rangbah u la pynpaw haba kren ha ka jingïalang rakhe ïa ka jingdap 54 snem ka jingïoh jong ka Meghalaya ïa la ka jong ka jylla ha ka jingrakhe kaba long ha ka sien kaba nyngkong eh ha Baghmara, South Garo Hills District ha ane ka sngi Balang.
Ha kane ka jingrakhe la donlang ruh u Symbud Myntri Rangbah ka Jylla Bah Prestone Tynsong kumjuh u Myntri ka tnad Pule Puthi ka sorkar jylla Bah Lahkmen Rymbui.
La pynshongshit ïa kane ka jingïalang da ka jingrwai na ka Khmih Choir Shillong bud pat sa bun bha ki prokram na ki kynhun bapher bapher kiba pyni ïa ka kolshor bad ka tynrai jong ka jylla.
Na ka liang u Myntri Rangbah u la ïai ban biang ruh da kaba ong ba dei ka jingkyrkhu Blei ba ki paidbah ka Jylla ki la ïoh ïa la ka jong ka jaka, ka jong ka jylla bad la ka jong ka tynrai.
“Da ka jingsngewskhem, ka jingkut jingmut bad ka mon kaba jwat, ngin sa poi sha ka thong kaba ngi buh na ka bynta ïalade,” u la ong.
Ha kane ka sngi u Myntri Rangbah u la ai ruh ka burom kaba kyrpang ïa ki nongïakhun ban ïoh la ka jong ka jylla lyngba ka lynti kaba jai jai khlmem da umsnam hynrei kaba ïai neh bad kaba seisoh.
U la pynkynmaw ruh ba ha ka por ba ka jingïakhun ban ïoh ïa la ka jong ka jylla ka jur bha, ki nongshong shnong wat hapdeng bun ki jingïapher la ka long ha ka jaidbynriew bad ka imlang sahlang hynrei mlon ki ïa tylli lang kawei na ka bynta kawei ka thong.
Kumta haba banjur halor kiba bun ki jingpyrshang ban pynïapait ha kine ki sngi ba mynta khamtam eh ha ki rynsan social media, u Myntri Rangbah u la ong ba ki jingsngew pyrshah bad ka jingwanrah jingisih hapdeng ka imlang sahlang ki la pynthut bad ktah haduh katta katta.
“Haba nga ïohi ïa kane ka jingpyrshang ban wanrah ka jingisih bad ka jingsngewïapher nga ju kylli ïalade la ngi la klet noh mo ïa kaei kaba ki nongïalam jongngi ki ïakhun.” U la bynrap biang ruh ba ki riewtymmen riewsan bad ki kmie jong ka Meghalaya ki da pyndem ha ki j jingduwai na ka bynta ban ïoh ïa la ka jong ka jylla bad kine baroh ki jingduwai ki la urlong.
Ha kajuh ka por u la pynshai ruh ba ka jingjied ban pynlong ïa ka jingrakhe ïa ka Meghalaya Day ha South Garo Hills kadei namar katei ka distrik kadei ka iing jong u (L) Captain Williamson A. Sangma, u Myntri Rangbah ba nygkong eh ka Meghalaya uba dei ruh uwei na ki nongpynwandur ïa ka jylla. Shuh shuh u ong ruh ba ka jingpynlong ïa kane ka prokram ha Baghmara ka dei ban ai burom bad ka jingsngewnguh ïa ka jingaiti lut jong u na ka bynta ka jylla.
Ha kane ka sngi la ïoh ruh ïa ka jingkren na u Symbud Myntri Rangbah, Bah Prestone Tynsong, na u Myntri ka tnad Pule Puthi, Bah Lahkmen Rymbui, na u Chief Secretary ka Jylla, D. Shakil P Ahammed, na u Vijay Kumar Mantri, Commissioner and Secretary, Information and Public Relations Department bad kumjuh na u Bah BS Sohliya ba dei u Secretary, Information and Public Relations Department bad Director of Information and Public Relations.
Ha kane ka prokram la pynbna ruh ïa ki nongïoh ïa ka khusnam Meghalaya Day Awards bad Governor’s Police Medal kum ka jingithuh na ka bynta ka jingshakri jong ki ha ki liang bapher bapher. La sam ruh ïa ka Meghalaya Day Excellence Awards da u Myntri Rangbah ka Jylla.
Hadien kane la pyni paidbah ruh ïa ka video kaba ai kyrteng – Rise Meghalaya kaba pyni ïa ka jingïaid lynti jong ka Meghalaya.