Shillong, Iaïong, 24: Ka long kaei kaei kaba sngewsih bad sngewdiaw ban ïohi ba ka sorkar kam shym la shim khia ban weng ïa ki jingeh jong ki Nonghikai namar ba ki hap beit ban ïakhih ban ïoh ïa ki hok jongki, ha ka jingshisha ka tnad pule puthi ka la dei ban buh hakhmat duh eh ïa ki nonghikai namar ki nonghikai ki dei ki nongtei ïa ki paia ba thymmai jongka jylla kiba dei ki khynnah skul kiba long ka lawei jongka jylla hi, ong u bah P.T Sawkmie MLA ka Mawlai Constituency.
Haba ïakren bad u nongthoh khubor u la ong “ Nga sngew khia jur halor kane ka jingbym shim khia jongka sorkar ban weng ïa kine ki jingeh jong ki nonghikai hapoh ki kynhun bapher bapher kynthup ha ka Federation of All School Teachers of Meghalaya (FASToM). Nga kyrpad ïa ka tnad pule puthi lyngba u myntri jongka ba un thaw ki lad ki lynti ban weng ïa kine ki jingeh” ong u bah Sawkmie.
Lada phai sha ki nonghikai hapoh ka lama FASToM, ne ki nonghikai SSA ki hap ban ïakhih beit na ka por sha ka por ban ïoh ïa ki hok ba ki dei ban ïoh. Kane ka jinghap ïakhih ki nonghikai ka ktah jur ïa ki khynnah skul namar ki nonghikai kim ïoh shuh ban pynlut por ban ai jinghikai ïa ki khynnah skul hynrei ki hap ban pyrkhat kumno ban leh ban pynkohnguh ïa ka sorkar ban ai ïa ki jingdawa jongki. Kane ka la pynhiar ïa ka pule puthi haka jylla bad kumta ka sorkar ka dei ban shim khia bha ïa kane ka kam, ong u bah P.T Sawkmie.
Kumba long ki nonghikai hapoh ka lama FASToM ki dawa ba dei ban kyntiew kyrdan Deficit ïa ki skul Adhoc kiba don 2, 248 tylli katba u Myntri ka tnad pule puthi u ma Lahkmen Rymbui u la dep kren shai ba ka sorkar kam lah ban kyntiew kyrdan Deficit ïa ki skul Adhoc ha ka jingïakren bad ki lad pathai khubor. Halor kane na ka liang ki nonghikai ki dawa ba dei ban kyntiew noh ïa ka tulop jongki sha ka 18,000 tyngka bad ban kyntiew ruh 5 % man la u snem nalor kata ki dawa ruh ban siew tam ïa ki Principal. Hynrei ka jingïakren haka sngi Thohdieng kam poi shano shano ruh na kata ka daw kim banse ban rai da ka jingïakhih kaba tyngeh.
