Shillong, Rymphang 24: Ki nongïalam jong ka liang pyrshah ha ka Ïing dorbar ki la pynpaw ïa ka jingsngewkhia ha kaba ïadei bad ka jingpyndonkam ïa ka Chief Minister Special Development Fund (CMSDF) da kaba kynnoh ba kane ka dei ka jingshim khia kum ka jingmyntoi ha ka saiñ pyrthei.
Ha kaba ïadei ha ka cut motion ha kaba ïadei bad ki jingdawa na ka bynta ki grant, u nongialam ka liang pyrshah Dr. MUkul Sangma u la ong ba kane kadei tang ka atiar kaba dei ban ïoh ka jingmyntoi ha ka saiñ pyrthei.
Na ka liang u nongïalam ka liang pyrshah u la kwah ruh ban tip ïa ka jingdon jong ki skhim kiba kyrshan hapoh ka CMSDF, bad kiba ïoh jingmyntoi bad ka rukom jied ïa ki ha kaba ïadei bad kane ka jingpyntreikam ïa kane ka skhim.
Katkum ka jingong jong u Dr. Sangma kane ka scheme ka dei ban thaw ïa ka sawdong sawkun na ka bynta ka ophis jong u Myntri Rangbah ban jubab ïa kiba bun ki jingdawa.
Katkum ka jingong jong u, la ong ba naduh ba la sdang ïa kane ka skhim ki MLA ki la ïoh jingtip ba kane kadei ka jingtyrwa kaba hap hapoh ka CMSDF hynrei ha kine ki snem ba la dep ki nongïalam ka liang pyrshah ki khlem ïoh kino kino ki shithi napoh ka CM Secretariat.
“Namar kata ha ka jingbym biang jong ki lad jingïakren ka la long ka jingeh kaba khraw ban ïoh ki lad jingïarap bad kumjuh ruh ïa ki lad ki lynti ba dei ban bud,” ong u Dr. Sangma.
Haba ïa shim bynta ha kane ka jingïatai na ka liang jong u MLA ka Mawlai u Bah Brighstarwell Marbaniang u la pynpaw ïa ka jinglyngngoh ban ïohi ïa u Myntri Rangbah u Conrad K Sangma ban leit sam ïa ki skhim napoh ka CMSDF.
Na ka liang jong u Bah Marbaniang u la pyntip ïa ka ïing ba ma u shimet u la phah ïa ki jingtyrwa sha ka ophis jong u Myntri Rangbah haduh 3 sien naduh u snem 2023 haduh u snem 2025 hynrei haduh mynta u khlem ïoh ïa kano kano ka jingai ktien na ka liang jong u Sangma.
Haba jubab ïa kane, na ka liang jong u Myntri Rangbah u la ong ba haba ai ïa kino kino ki skhim ym don satia ka jingpeit ha ka liang ka saiñ pyrthei.
U la ong ruh ba kan lah ban don ka jingïapher ha ki kyrdan jong ki constituency, hynrei ha kaba ïadei bad ka jingsam ïa ki skhim ka long kaba plie ïa baroh.
Na ka liang jong u Sangma u la ong ba ha ka snem 2025-2026 ïa ka CMSDF la dep ban mang kumba T. 50 klur bad ïa kane la dep ban pyndonkam.
