Shillong, Risaw 08: Ka Voice of the People Party (VPP) ka la pynpaw ïa ka jingsngewlem ïa kito ki longïing jong kito ki lanot kiba la duh ïa la ka jingim ha ka jingjia shlei um bad twa khyndew ha Garo Hills. Ka jingduh jong ki 17 ngut ki mynsiem briew, kynthup ïa u kpa bad u khun ba dang rit jong u, kumjuh ruh ïa ka kurim na ka daw ka jingshah tep na ka jingtwa ka khyndew, ka pynkynmaw ïa ka jingdonkam kaba kyrkieh na ka bynta ban long kiba la pynkhreh halor kine ki kam ba wan lynshop ka mariang ha ka jylla.
Katkum ka kyrwoh ba la phah da u Nongaiktien ka VPP u Dr Batskhem Myrboh u la ong kumba ki paid Garo ki la bteng ban mad ïa kine ki jingeh na ka daw ka jingwan lynshop jong ki bor ka mariang, hap ïaroh ïa ki bor pynïaid shnong bad ki bor distrik kynthup ïa ki nongtrei ka disaster management, kiba la treikam khlem sangeh ban ai ki lad jingïarap sha ki longïing. U la ong ba ka seng ka pynpaw ka jingsngewkhia halor ka jingslem ban pynpoi ki lad jingïarap sha ki katto katne ki jaka, khamtam ki katto katne ki shnong kiba la sahkut na ka daw kine ki jingjia ba shah pynjulor ha ki bor ka mariang.
Katba ki bor pynïaid ki la sdang ban sam ïa ki lad jingïarap, ka long kaba shai ba dang donkam bun ban leh halor kane ka kam. Na ka liang ka VPP ka la kyntu ïa ka sorkar Meghalaya Democratic Alliance (MDA), ba la ïalam da ka NPP, ban shim ïa kane ka kabu ban peit ïa ki jingduna haba ïadei bad kane kam ai jingïarap, kaba la ktah bha ïa ki nongshong shnong bad kiba la shah ieh marwei ha kane ka por kaba donkam kyrkieh.
“Ka jingduna ha ki lad ka ïaid ka ïeng lyngba ki surok bad ka kit ka bah ha ki katto katne ki distrik kiba la shah ktah, kum ha South Garo Hills, ka pyni ïa ka jingdkoh ki sorkar kiba la leit ban pynlut ha kiba bun ki lad jingtei kiba lah ban ïada na kum kine ki jingjia ba wan lynshop ka bor mariang,” ong u Dr. Batskhem ha ka kyrwoh khubor.
Ha kaba ïadei bad kane na ka liang ka VPP ka kyntu ba dei ban pynheh ïa ki lad ai jingïarap sha ki longïing kiba la ngat ha kane ka jingjia bad ki bym ïoh satia ïa ki jingkyrshan, khamtam sha ki jaka ba kyndong eh bad ki jaka bym lah ban poi.
U la ong ba ka la donkam ban pynbha ïa ka thaiñ Garo Hills, kynthup ïa ka surok kaba biang, ka jingtei ïa ki jingkieng, bad ki lad ban ïada na kum kine ki jingjia ba sngewsih.
U la ong ba ka VPP ka ïeng lang bad ki paidbah ka Garo Hills ha kum kane ka por ba ki mad jingeh bad kan bteng ban kyrshan ïa ka bha ka miat jong ki khnang ba ka sur jong ki kan poi sha ki shkor jong ki bor ba dei peit.
