Jowai, Nohprah 19: Ka Pnar Student Movement (PSM) haka jingthmu ban leit ïashim bynta haka Public Hearing ka Shree Cement ha Khara Siang Lum Pyrshin Daistong, hynrei kila shah khang lynti ha lad Tongseng Nongkhlieh da ka dumper kaba la pynïeng hapdeng surok ha ryngkat ki briew kiba la tap durkhmat kiba kam ba ki dei ki nongshong ka Elaka Nongkhlieh.
Ïa kane ka jingpynsngew paidbah la khot pynlong da ka Meghalaya State Pollution Control Board. Kum ka seng kaba peit ïa ka bha ka miat jong kiba bun ba lang kala pynpaw ka jingsniawkhia kaba khraw eh halor kane ka jingleh jong kitei ki briew kiba la khang lynti haduh ba ki dkhot ka seng kim ïoh lad shuh ban leit rung sha ka jaka ba pynlong jingïalang.
Na ka liang ka seng kala pyrshah ïa kane ka jingleh jong kitei ki briew bad ka long kumba pynkheiñ ïa ka kyndon aiñ kaba dei ka hok jong kiwei ban leit ïashim bynta wat hadien bala dep pynmih ïa ka Notice kaba la khot lang ïa baroh ki briew ban ïahim bynta la ki kyrshan ne pyrshah hala ki jong ki jong ki jingsngew.
Ka seng kala kynthoh jur ba kane ka jingleh bad ka jingkhang lad ïa ka hok jong kiwei ka lah ban don kaei re kaei kaba sha lyndet bad kala long ruh kum ka jingpynkheiñ ïa ka kyndon aiñ.
Shuh shuh ka seng kala pynsngew bunsien hashwa ban wan seng ïa ki kharkhana kala don ka jingïateh soskular bad ki trai shnong, hynrei kumba la ïohi mynta kala shem shitom eh ïa ki trai shnong ban ïoh ïa ki kam ki jam, ka roi ka par bad kam don satia kano kano ka jingmyntoi ïa ki paidbah ka shnong ne ki trai jylla.
Halor kane ka nongrim ka seng PSM ka kwah khnang khnang ban leit ïashim bynta ha kane ka Public Hearing bad ban pynsngewthuh shai sha ki paidbah nongshong shnong kiba don ha sawdong jong katei thaiñ kaba la thmu ban seng kharkhana dewbilat, la pynkut ka kyrwoh na u Publicity Secretary ma S.Lakiang.
