Sngewkhia ka MYM ba shah iehbeiñ ka Mawshynrut Civil Sub Division
![](https://mawphor.com/wp-content/uploads/2023/08/west-Copy-500x430.jpg)
Riangdo, Nailar 03: Ka Mawshynrut Youth Movement (MYM) ka la pynpaw ka jingsngewkhia halor ka jingshah iehnoh shrah shah iehnoh beiñ ka thaiñ Mawshynrut ha kiba bun ki bynta, la ka long ha ki tnad sorkar bapher bapher khamtam ha ka liang ka koit ka khiah lane wat ki surok kali kiba pynpoi ïa ki paidbah sha ki shnong ki thaw.
Dang shen ka MYM hapoh ka jingïalang jong u Bah Shem Rynñiaw President, ka la leit ban ïakynduh markhmat bad u Deputy Commissioner ban pynpaw halor ka jingdonkam ïa ki nongtrei hapoh ka tnad Animal Husbandary & Veterinary Dispensary bad Animal Husbandary & Veterinary Office.
Ka jingleit tur sha u DC ka dei hadien ba ka MYM ka la dep jurip ïa katei ka tnad bad la lap ba ha kitei ki ar tylli ki ophis treikam hapoh Mawshynrut, ym don Doctor bad kim don Assistant lane nongtrei hapoh kitei ki office.
Da ka jingsngewkhia, ka seng ka kyrpad ïa u khlieh duh ka District ban ïarap lem da kaba kyntur sha ka tnad ba dei peit, ban phah ki Doctor bad ki Assistant kham kloi, na bynta ka jingbha ki paidbah nongshong shnong ka Mawshynrut, khamtam ki nongri jingri bad kito kiba seng kam lajong da kane ka kam.
Kumjuh ruh, ka seng ka la pynpaw ka jingsngewkhia kaba jur halor ka jingbym don ki nongtrei ba neh (full time) ha ki tnad sorkar bapher bapher hapoh Mawshynrut Civil Sub Division, kaba la pynlong ïa ki paidbah ban ïakynduh jingeh shibun.
Ha kine ki 6 bnai, palat 85% na ka 100% ki ophisar ha ki Department sorkar hapoh Mawshynrut ki shu ïa wan trei part time, kumta ka jingïadei kam ki paidbah ka la dkoh shibun eh. Namar kata ka Sorkar ka la dei ban leh kham kyrkieh, khnang ban nym buh jingeh ïa ki nongshong shnong ka Mawshynrut.
Ha ka jingïadei bad ki surok kali, u Bah Shem Rynñiaw u la pyntip ruh ba ka seng ka la leit dawa na u E.E PWD Mawshynrut ban bthah ïa ki contractor ba kin siang maw noh ïa ka surok na Thaiem sha Mawsyrpat 12 kaba kilometer.
Ka daw ka dei namar ba ki la shu tih ïa ka khyndew ha ka aiom tlang ba la dep khlem pat siang maw. Kane ka la pynjynjar ïa ki nongshong shnong ha ka kit ka bah, khamtam ïa kiba pang ba shitom kat haduh ba wat ki kali four wheel ruh kim long shuh ban ïaid ïa katei ka surok.