Shillong, ïaïong, 26: Ka Meghalaya Joint Council of Trade Unions and Associations (MJCTU&A) ka la pynpaw ïa ka jingsngewkhia halor ka jingmynthi jong ka Sorkar ban pynurlong ïa ki jingdawa ba la sah pongding jong ki nonghikai skul Adhoc ka jylla.
“Ki nonghikai kiba la pynlong ïa ka jingïakhih hapoh ka lama jong ka Federation of All School Teachers of Meghalaya (FASTOM), ki la dawa la slem bha ban kyntiew kyrdan Deficit Grants-in-Aid bad ban kyntiew ïa ka jingsiew tulop kaba duna bha haduh katta katta,” ong u kyrwoh ba la phah da u President u Dr. M.N Bhattacharjee bad u General Secretary u JL Das.
“Haba ai jingkyrshan ïa ka jingdawa jong ki nonghikai hapoh ka jingïalam jong ka FASToM, ka MJCTU&A ka kyntu ïa ka Sorkar Meghalaya ban pynurlong noh mardor ïa ki jingdawa jong ki nonghikai na ka bynta ka bha ka miat jong ki khynnah skul bad ki paidbah,” ong u kyrwoh.
