Shillong, Jymmang 06: Ka Khasi Jaintia Christian Leaders Forum (KJCLF) kala pynpaw ïa ka jingsngewkhia halor ka jingthmu jong ka Sorkar Jylla ban ithuh noh da ka aiñ ïa ka kam khalai hapoh ka Jylla.
Ka KJCLF hapoh ka jingïalam u Secretary Rev Edwin Kharkongor, kala ïakynduh ïa u Myntri Rangbah ka Jylla Conrad Kongkal Sangma hynne ka sngi ban pynsngew ïa ka jingsngew pyrshah jong ka Forum ïa kane ka jingthmu jong ka Sorkar.
Haba ïakren bad ki nongthoh khubor, u Rev Kharkongor ula ong ba ka jingpynbna jong ka Sorkar ban ithuh noh da ka aiñ ïa ka kam khalai kala pynkyndit ïa ka forum haba bynrap ba ka jingsngewkhia jong ki ka long ba haduh katno ka kam khalai kan ktah ïa ka jinglong, ka jingmut jingpyrkhat jong ki nongshongshnong ka Jylla.
U Rev Kharkongor u ong ba naba u Myntri Rangbah ka Jylla ula pynpaw ba ka jingpyntreikam ïa kane ka jingthmu jong ka Sorkar kan sdang hadien ka jingiasylloj bad ki kynhun bapher bapher kynthup ïa ki jingai jing mut, ka Forum kan hap ban ap bad peit ba kumno kane ka kam ka ïaid.
Haba kynthoh ïa ka jingpynksan ka Sorkar ba ka kam khalai kan pynrben ïa ka pla tyngka ka Jylla haba khanglad ruh ïa ki trai shnong ban iashimbynta, une u Nongïalam ka KJCLP ula ong “Kum ki Nongïalam Khristan ngim pyn shlur ïa kano kano ka kam khalai. Ha ka por ba pynlong aiñ ïa kane ka aiñ, ngi la kyntu ïa ka Sorkar Jylla ban pyndam bad ym shym la pyntreikam shuh”.
“Ïa mynta hi ngim pat lah ban ong eiei shuh namar kum ka Forum ka donkam ban iasyllok shuwa” ula ong.
Ka Sorkar Jylla kala dep pynbna ban ithuh noh da ka aiñ ïa ka kam khalai ha Jylla hynrei tan gia ki nongwan kai na shabar ka Jylla. Ka jingpynkhreh ïa kane kala sdang naduh u snem bala dep hadien ba ka Sorkar kala thaw ïa ka Regulation of Gaming Rules 2021, ba shah ban ai licence ha kaban pynïap ïa ki online bad offline game.
