Nongpoh, Nailur 09: Ban ïa tynrong lem halor ka jingeh ki paidbah bad khamtam ka jingshah ktah ki khynnah skul na ka jingthud palat ka bording ilektrik ha ka thaiñ Raid Myrdon ha Ri Bhoi, ka Confederation of Ri Bhoi People (CoRP), Central Zone ka la shim khia ban leit kynduh ïa ki bor ba dei peit ka tnad MeECL ha Nongpoh na ka bynta ban ïa kren halor kitei ki jingshah ktah ki paidbah, hynrei ha kane ka jingleit ïa kynduh ka seng kam shym la ioh lad ban ïa kynduh ïa ki bor ba dei peit bad ka la pynpaw ka jingsngewkhia kaba jur halor kane ka jingthud palat ka bording ba kum ka seng ka kyntu ïa ka tnad MeECL ba ka dei ban shim khia na kabynta ban pynbiang bording sha kitei ki shnong ba hap ha ka Raid Myrdon.
Kane ka jingthmu ki nongïalam ka seng ban leit kynduh ïa ki bor ba dei peit ka tnad MeECL ha Nongpoh Sub Division ka long ruh ban ioh wad jingtip kaei ka daw kaba la pynlong ïa ka tnad MeECL ba kam lah ban pynbiang bording thikna sha ki shnong ba hap ha ka thain Raid Myrdon, hynrei kane ka jingthmu ban ïa kren halor katei ka kam ka la shu pulom namar na ka liang ki nongïalam kim shym la ioh lad ban ïa kynduh ïa ki bor ba dei peit katei ka tnad MeECL ha Nongpoh.
Haba ïa kren bad ki Nongthoh Khubor, u President ka CoRP Central Zone, U Bah Shining Kyntla, u la ong ba ka seng ka dap shisha da ka mynsiem jong ka jingsngewkhia kaba jur halor ka jingshah ktah ki paidbah na ka jingthud ka bording ha ki shnong ba hap ha ka Raid Myrdon bad ka daw ka long ba ka jingthud ka bording ka la ktah shisha ïa ki paidbah khamta ha kane ka juk mynta khlem ka bording ilektrik bun ki kam ki la shu sahteng bad duhnong ïa ki paidbah.
“Kaba kham sngewkhia ïa ka seng ka long na ka bynta ki khynnah skul kiba pule kot ha ka por mynmiet ha kaba na ka daw ka jingthud ka bording ka la ktah ruh wat ïa ka jingpule kot ki khynnah skul” ong u Bah Shining Kynta bad bynrap ruh kum ka seng ka da sngewkhia jur namar ki paidbah ïa ka bai bording ki hap ban siew man la u bnai bad katba ka bording pat kam poi thikna sha ki paidbah kumba ki donkam” u la bynrap.
U la ong ruh ba ka seng ka kyntu ïa ki bor ka MeECL lem bad ïa ka sorkar ba ki hap ban pynbiang ïa ka nbording ilektrik khamtam naduh ka por 7 baje haduh 10 baje mynmiet, namar kane ka por ka dei ka pork aba ki khynnah skul ki dang pule kot bad ruh ki paidbah ki dang trei shibun ki kam bad lada khlem ka bording ilektrik kane ka la wan rah ka jingeh kaba khraw ïa ki paidbah ba kin pyndep ïa la ki kam ki jam.
Shuh shuh, u la kyntu ruh ba ka seng ka kyrpad jur ïa ka tnad MeECL ba kan shim khia halor kane ka bynta ka jingshah ktah ki paidbah na ka jingthud palat ka bording ilektrik bad khamtam kine ki bnai ki dei ki bnai ba ki khynnah pule ki dang pynkhrah ïa ka Selection Test jong ka SSLC bad HSSLC ba khlem ka bording ki khynnah skul ki shem jingeh ban pule ïa ki kot pule jongki, u la bynrap.
