Shillong, Jylliew: U MLA ka Mawlai u Bah PT Sawkmie hynne ka sngi Balang u la pynpaw ka jingsngewkhia ka ba jur halor ka jingjyllei bad jur ki kam tuh kam thiem hapoh ka nongbah, khamtam ha ka thaiñ Mawlai.
Ha ka sngi ba Ar ba la lah, u Bah PT Sawkmie u la ïakynduh ïa kawei ka longkmie ka ba shong ba sah ha Mawlai Mawkynroh Unshing (la buhrieh noh ka kyrteng), kaba la shah tuh lut ki jaiñ ki nep, ki jaiñsem dhara, ki sopti phong, ka TV, ka pisa bad kiwei ki tiar, ha kaba u la ai jingïarap da ka song posa sha i hadien ba I la mad ïa kane ka jingshah tuh.
Na ka liang u MLA u ïathuh ruh ba u la ïoh ka jingwan ud wan nam jong kiba bun kiba la shah tuh hapoh ka thaiñ, kum ha Mawlai Motsyiar, katba ki dkhot ka longïing ki dang bunkam ba shitom iwei na ki dkhot ka longïing haba leit buh hospital ïa I bad ym don briew shuh ha ïing, u nongtuh u shim kabu bad u la tuh lut ïa ki jingdon jingem hapoh ïing.
Nalor kata u la ïathuh ruh ba ki nongtuh kim map wat ïa ki bitor plastik ba lum da ki nongtam ban die na ka bynta ban bsa ïa la ka kpoh. Kane ka la jia ïa kawei ka longïing ha Nongkwar iba la lum ïa ki bitor plastik bad ka la dap shi byrni sa tang ban leit die noh, hynrei la shah tuh noh, I bapli I la shu pangnud na kane ka jingjia.
Ym tang katta, hynrei ki don kiba la shah tuh tape kali, ki battery bad kiwei kiwei.Ha ka ba ïa dei bad kane ka jingjur ki kam tuh u bah Sawkmie u kyntu ïa ki bor pulit ba kin shimkhia lem bad kham pynjur ka pahara bad ban pyndonkam ïa ka jingstad jong ki ban tehlakam ïa kane, kaba man ki longïing ki shongsyier ha kine ki sngi ki ba mynta.Shuh shuh u kyntu ruh ïa ki paidbah nongshong shnong ban long kiba phikir bad husiar.
