Sngewkhia jur u Chairman Umlaper ba leh bymsuidñiew ka company Amrit ïa ki paidbah

Khliehriat, Iaiong 12 : U Chairman jong ka shnong Umlaper, u bah Poila Pdang, u la pynpaw ka jingsngew khia kaba khraw halor ka jingleh bymsuidñiew ka company dewbilat, ka Amrit Cement, kaba don ha shnong Umlaper, ka bym don satia ka jingsngewlem na ka bynta ka bha ka miat jong ki paidbah nongshong shnong, kane ka company ka la wan ban sdang ïa ka karkhana naduh u snem 2008 bad ong ba haduh mynta kam pat sym la don satia kano kano ka jingïarap na katei ka company ka ban kyntiew ïa ki nongshongshnong bad ki paidbah ruh ki shu mad tang ki jingeh namar ki jingleh khlemakor ki nongtrei katei ka company.
Ha kaba ïadei bad kane ka jingleh bymsalia ka company Amrit, na ka liang ka Hynñiewtrep Youth Council, Narpuh Circle ruh ba la lam khmat da u President, u bah Kitdorlang Mukhim lem bad ka HYC Umlong Unit, ba la lam khmat da u President, u bah Dismid Sumer, ki la ai ka jingkyrshan ba pura ïa ka shnong Umlaper bad ong ba ka seng kan ïai don lang ryngkat bad ka shnong bad kin nym ailad satia ïa ka company ba kan shu leh katba mon.
Haba kren shaphang ka jingshah ieh beiñ ka shnong Umlaper, u bah Poila Pdang u la ong “Nga sngewlyngoh bad bunsien nga ju pyrkhat sngewkhia na ka bynta ki khun shnong, ngi la ju pyrshang ban ïakren bad ka company Amrit bad ngi la ju kyntu ruh ban aikam aijam lem ïa ki khun shnong, hynrei haduh mynta kane ka company kam pat ju thungkam ïa ki nongshongshnong ka Umlaper, kane ka compny ka la shu ieh beiñ ruh ïa ka shnong ha kaba ïadei bad ki kam pynroi ban kyntiew ban pynroi ïa ka shnong ka thaw”
Utei u rangbah, u la ïathuh ruh ba lada ki nongshongshnong ki leit ban shim dawai na ka dispensary jong katei ka company ki hap ban siew pisa, lada shim tang uwei u dawai kuli ruh ki hap ban siew pisa T.10 tyngka lane T20 tyngka, kane ka ju pynlyngngoh ïa ki paidbah nongshong shnong.
Shuh shuh, kawei kaba utei u rangbah u sngewkhia jur, ka dei halor ka jingleh khlemakor ki briew jong ka company Amrit ha kaba ki la ju bret pathar ïa ki ñiut, kumjuh ruh ka jingpyntuid pathar ïa ki um paiñkhana, ki um jakhlia sha ki um ki wah, ki lynti shnong, ki jaka shnong bad ki jakarep khlem pyrkhat shuh ïa ki paidbah nongshong shnong, la ong ba halor kane na ka liang ka shnong ka la dep phah da ka jingthoh sha ka company Amrit Cement bad kyntu ïa ka company ba kan shna bad ker bha ïa ka jaka bret ñiut khnang ba kin nym saphriang ki ñiut bad ruh ki la kyntu ba kin sangeh noh ïa ka jingpyntuid jakhlia sha ki jaka shnong namar teng teng ki masi ki blang haba kiba don hapoh shnong haba ki bam ïa ki ñiut ki iohpang, kumta u la pynpaw ka jingsngew diaw halor kane ka jingleh khlemakor katei ka company.
“Nga kyntu ruh ïa kiba peit ïa ka district, kum ki bor district ba kin peit lem namar ngi mad tang ki jingeh kum ki nongshong shnong naduh u snem 2008 haduh mynta, khamtam ban peit lem halor kane ka jingbret ñiut pathar ka company sha ki jaka shnong, sha ki um ki wah bad sha ki lynti ki syngkien, sha ki jaka rep bad kumjuh ruh ban peit lem ha kaba ïadei bad ka ïohkam ïohjam jong ki nongshongshnong ba kin ïoh kam lem hapoh kane ka company Amrit kaba don hapoh u pud u sam jong ka shnong” ong u bah Poila Pdang.
Na ka liang u President jong ka Hynñiewtrep Youth Council Narpuh Circle, u bah Kitdorlang Mukhim bad u President HYC Umlong Unit, u bah Dismid Sumer, ki la pynpaw ka jingsngewkhia halor kane ka jingleh khlemakor ka company Amrit ka bym kheiñ snep ïa ki nongshong shnong jong ka shnong Umlaper bad kynthoh ruh ba kane ka dei ka jingïuhroit ïa ki paidbah, ki la ai ka jingkyrshan kaba pura ïa ka shnong Umlaper bad ong ruh ba ka seng kan ïai don ryngkat bad ka shnong, ka seng kan ïai buddien ruh ïa kane ka jingleh ka company.
Haba kren shaphang ka thungkam thungjam ïa ki nongshong shnong, u President HYC Narpuh Circle, u la ong “Ngi la dep buh kot jingthoh sha u Deputy Commissioner bad na ka liang ka seng ngi kyntu ïa ka company Amrit ba ka dei ban aikam aijam noh ïa ki nongshongshnong kumba leh lem kiwei kiwei ki company dewbilat kiba don ha East Jaiñtia Hills District, ka khubor sha baroh ki karkhana dewbilat kiba don hapoh ka distrrict ka long ruh ba nangne shakhmat ki dei ban tip ba ki dei ban aikam aijam kham bun ïa ki briew ka thaiñ bad ïa kane ka mat ngi la ju ïakren na ka por sha ka por”