Sngewkhia jur ki nongïalam ka MCTODA ba khlem sei soh eiei ka jingïakren ha DC ophis ha Khliehriat

Khliehriat Naiwieng 03 : Ki nongialam jong ka Meghalaya Commercial Truck Owners and Drivers Association (MCTODA) ki pynpaw ka jingsngew khia halor ka jingbym sei soh ka jingialang ba khot pynlong ha ophis u Deputy Commissioner ka East Jaiñtia Hills District ha Khliehriat mynta ka sngi bad ka jingiakren ruh kam poi shaei shaei ruh, u nongialam jong ka MCTODA, u bah M.Marngar, u la ong ba naduh ba sdang ka jingialang haduh ba kut ki heh jong ki company dewbilat ki la shu pynbor beit ïa ka Association ba pynsangeh noh ïa kane ka pakhang kali ne ka strike ba pakhang ïa ki kali ba kit dewbilat bad clinker.
Na ka liang u bah M.Marngar, u la ong “Kumno hapoh jylla ngin kit ha ka dor T9 tyngka katba shar ka jylla pat ngi hap kit rit dor T5 tyngka , ha ka jingialang ki cement company ki la pynpaw shai ba ki bun ki jingpynlut ba ki pynlut shato shane, hato balei kim pynduna noh ïa kata ka jing pynlut ba ki ai shato shane bad siew hok noh ïa kaba dei ban siew”
Shuh shuh Ki briew jong ki karkhana dewbilat kim pat lah ban pynshai satia ïa ka dor ba kin ai bai kit te halor kane u bah Marngar u la ong “Ai ïa ngi kata ka dor kaba phi tyrwa kaba tang shi por mynta lada ki dkhot jong ngi ki hun kam lei lei te hadien kata ngin sa iakren pat, na ka liang ki company ki pyneh beit bad ong pynban ban kit beit da kato ka dor kaba ki ju kit, te kane ka jingleh jong ki bad kane ka jingialang mynta ka sngi ka long kum ka jingpyrshang ban pynbiej ïa ngi kumba jia ha ki por ba mynshwa namar ha ki por mynshwa ki la don ki jingiakren la bun-bun sien bad ki Association Truck, nga itynnad ïa ki nongialam kiba mynshwa hooid ki la iakren ïa ki mat, te imat ka la shu sahkut noh, te na ka liang jong ngi ruh ngi la dep iakren bad ki la ong ba lada phi kit ngim lah ban ai direct ka jingsiew hynrei hap ai lyngba ki transporter lada kit shabar katba lada kit hapoh ka jylla pat ki phah buh da ki dalal, te kine ki dalal ki khñoit ïa ngi, te lada kine ki khñoit ïa ngi kan mih ka kynrum kynram hapdeng ka assoction, ka company bad ka sorkar ruh, te ngi ong ban iehnoh noh ïa kine ki dalal hynrei ki ong ba kim lah ban leh ïa kane, na ka liang jong ki hi naduh ba sdang ka jingialang ki la shu pynbor beit ïa ngi ban shu pynkut noh ïa ka strike bad ngim ioh eiei na kane ka jingialang, shuh shuh ha kane ka jingialang ngi lap ïa kiei kiei ki bym sngewtynnad namar mynshwa ki company dewbilat ki phah da kiwei ki briew bad mynta pat ki phah da kiwei, mynta kine kiba wan na ka company ki dei ki bym don ka bor ban iakren, kane ka bym sngewtynnad ba ngin pdiang bad ki la pynbor ruh ba ngin shim ïa ka dor T9 tyngka ban kit ïa ki mar kiba hap tang hapoh Meghalaya katba ïa ki mar kiba dei ban kit shabar Meghalaya pat da ka dor T5 tyngka, lada pynhap dewbilat ne clinker kum ha Nongpoh ngin shim da ka dor sorkar bad lada ngi iaid na kajuh ka lynti shaduh Assam pat ngin shim da ka dor kaba kham hapoh, te kane ka la long kumba ñion beiñ ïa ki para doh para snam”.
Utei u nongialam jong ka MCTODA u la ong ruh ba “ki driver ki la iathuh ba ïa ki kali bad driver kiba dei trai jylla la phah ieng lang ha kawei ka jaka bad phah ieng haduh shi taiew, ar taiew bad shi bnai ruh ban ap line ban ioh thep jingkit ne load bad haba ki nongñiah kali ki kylli don jingkit (load) ne em ? ki ong beit ba ym don jingkit, katba ïa ki kali jong ki company bad ki kali kiba na bar jylla pat mar ïa wan mar ïa thep mar, ngi la dep thoh ba lada ki pynieng ap tang ar sngi ruh ka la biang hynrei lada pyn ieng palat ïa ka ar sngi te hap ban iakren khnang ba u nongñiah kali un ioh ïa ka bai bam bam”
U bah Wanshwa Nongtdu, uba dei u Spoke Person jong ka MCTODA, u la ong ba ha kane ka jingialang mynta ka sngi na ka liang ki company dewbilat ki Khlem wan da ki Residential Director kiba dei hok ban iakren ïa ki kam “ imat ka don kaei kaei kaba ki mut ban ialehkai bad ka MCTODA, ngi hap ban pdiang ïa ka notification kaba la pynmih na DC office ruh , ngi iohi ruh ba ki don haduh lai saw tylli ki notificaton bad haba ngi wan hangne dei ban ai eiei ba ngin pynsngew sha ki paidbah hynrei kam don eiei ha ka jingiakren”
Ki nongialam jong ka MCTODA ki la pynpaw ruh shibun kiei kiei kiba kim sngewtynnad satia ba ki company dewbilat ki leh kiba long kumba ki iuhroit ïa ki kyndon ne ki Act ha kaba iadei bad kaba siew bainong ïa kiba trei hapoh company bad kiwei kiwei..