Shillong, Naitung 29: U nongïalam ka BJP bad u Myntri ka sorkar jylla u Bah AL Hek ha ka sngi baar u la pynpaw ka jingsngewhun kaba shimet jong u halor ki rukom treikam ka sorkar MDA ba la ïalam da ka seng NPP.
Haba jubab ïa ka jingkylli halor ki jingtreikam ka sorkar MDA, u Bah Hek u la phai sha ka jingdonkam ka jingshim bishar ki paidbah da kaba ong ba ka shong ha ki paidbah ban bishar ïa ki kam ba la leh da ka sorkar.
Ha kawei pat ka liang, na ka liang jong u, u la pynpaw ïa ka jingsngewhun kaba shimet jong u ïa ki kam ba la leh da ka sorkar, da kaba kdew ruh ïa ki jingeh bad ki jingïaleh ba la mad da ka sorkar.
“Ka shong ha ki paidbah ban bishar ym dei ma nga. Ki paidbah kin bishar hi. Kumno ngan bishar ïa la ka jong ka kam kaba nga la leh. Kaei baroh kaba ngi la leh bad da ka lynti ba sngewrit jong nga, nga pynpaw ïa la ka jong ka jingsngewhun. Ngi don shibun ban leh hynrei ha kajuh ka por pat ngi don ki pud,” ong u nongïalam ka BJP.
Halor kawei pat ka jingkylli, u Bah Hek u la ïathuh haba ïadei bad ka jingrai jong ka jingïaibteng jong u ban don hapoh ka kynhun myntri u la ong ba ka shong beit ha ka rai jong ka party, bad u la ong ba un ym lah ban kynthoh halor kane.
“Nga la ïathuh ïa phi ba ka shong ha ka rai jong ka party. Yn nai kylli ïa kane na nga. Phi lah ban leit kylli ïa ka party. Kane ka dei ka rai jong ka party,” u la bynrap.
