Sngewhun u Bah Wahlang ba la lah ban pyndep bun ki kam ha ka samoi treikam kum u CS ka jylla

Shillong, Nailur 29: U Chief secretary u Bah DP Wahlang uba la shongthait noh u la phai sha ki kam shakri jong u ha kine ki 3 snem 2 bnai ki samoi treikam jong u u la pynpaw ïa ka jingsngewhun ba u la lah ban pyndep ïa la ki jong ki kamram.
“Nga la pyndep 3 snem 2 bnai kum u chief secretary ka jylla. Katba nga dang phai dien biang mynta, nga sngew ba ka don ka jingsngewhun kaba khraw bha ha kine ki 3 snem bad kino kino ki thong bad ki jingthmu kiba nga la don naduh ka sngi sdang jong ka samoi treikam, nga la lah ban pynpura ïa ki da ka jingsngewhun,” ïathuh u Bah Wahlang sha ki lad pathai khubor ha ka sngi Nyngkong da kaba ai ka burom ruh ïa ka kynhun jong u kaba la kyrshan, ïa ka ïing ka sem bad ki nongïalam saiñ pyrthei ha ka jylla.
Ka samoi treikam jong u Bah Wahlang kum u Chief Secretary kan kut ha ka sngi baar ka 30 tarik. Ïa u yn mih bujli da u Dr. Shakil Ahammed, uba mynta u long kum u Additional Chief Secretary.
U Bah Wahlang u la pynpaw ba ka jinglong jingman ka suk ka saiñ ha ka jylla ka la long kaba ïaid beit bad kaba neh ha ka por ki samoi treikam jong u, hynrei ki don pat katto katne ki jingïakajia halor u pud u sam bad ka Assam bad kiwei ki kam bad u pud u sam ka ri Bangladesh.
“Nga la long uba kham donbok naba phai sha ka shongsuk shongsaiñ ha ka por jong nga, ka la long kaba jai jai bad kaba neh. Ki don kumba 2 ne 3 tylli ki jingjia. Kaba nyngkong kadei ïa ka jingïasiat ha ki jaka khappud bad ka Assam, ha kaba ngi hap ban pynsangeh noh ïa ka Cherry Blossom festival bad kine ki jia shisien lano ha shi lynter u pud u sam bad ka Assam bad ka kam Bangladesh ka dei kawei kaba ngi hap ban shim kam kyrkieh. Hynrei nalor kine, haba poi sha ka kam lehnoh bad ki kam pyntriem, ka la long la kumno kumno kaba shongsuk bad wat ha Shillong, Jowai bad Tura kumjuh ka jinglong jingman ka la long kaba neh. Kumta nga la ïoh ka por kaba kham aram ha ka samoi treikam jong nga.”
U Bah Wahlang u la pynpaw ruh ka jingkitbok ïa ki paralok bad ki ophisar kiba nadien jong u ba kin lah ban trei bha ïa ka kam.
U chief secretary ban shongthait noh u la kdew ruh ïa ki kam ban pynbeit ïa ki kam administrative bad ki jingkyntiew ïa ki service rule hajan baroh ki tnat ha kine ki 3 snem ki jingtreikam jong u.
U Bah Wahlang u la phah ruh ka khubor sha ki paralok ophisar jong u ki ban shimti ïa ka kam ba kin trei da ka jingaiti bad jingsngewtynnad, ban ithuh ïa ki rai jong ka sorkar halor ka jingim jong ki nongshong shnong.
U Bah Wahlang mynta u dang pynkhreh ban shimti sa ïa kawei pat ka kam kaba thymmai kum u Chairman ka Food Commission. U la pynpaw ïa ka jingangnud ban pynthikna ïa ka jingpyntreikam bha ïa ki prokram bapher bapher kiba ïadei bad ka jingbam ha ka jylla.
“Kadei ka kyrdan kaba don ka jingkitkhlieh kaba khraw naba ngan hap ban shim ka jingsumar bad kumjuh ruh ban khmih ïa ki rukom sam ïa u khaw PDS bad ki foodgrain bad kumjuh ruh ban khmih halor ka midday meal programme kumjuh ruh ka RTE bad ka bam kaba ju ai sha ki Anganwadi centre,” u la ong da kaba pynpaw ka jingkyrmen ba un trei marjan bad ka tnat ban pynthikna ba ki kam shakri dei ban ïoh da baroh kiba ïoh jingmyntoi.