Sngewbha shah ïa ki ar sorkar ban ïakren bad pynbeit noh ka ïakajia pud kaba la neh slem: Conrad

Shillong, Risaw 10: U Myntri Rangbah ka jylla u Conrad K Sangma ha ka sngi Thohdieng u la kyrpad ïa ki nongshong shnong jong baroh arliang kiba sah ha khappud ka Assam bad Meghalaya ban shah ïa ki artylli ki sorkar ban don bynta ïa ka jingïakren ban lah pynbeit noh ïa ka kam ïakajia pud kaba la neh la slem bha.
Kane ka jingkyrpad ka la wan shisngi ba la mih ïa ka jingïakynad kaba dang shu jia hapdeng ki 2 kynhun ki paidbah na baroh arliang kaba la lam sha ka jingïap jong uwei u briew hapoh ka shnong Lapangap kaba dang hab hapoh ka West Jaiñtia Hills District.
Katkum ka jingong u Sangma, kane ka jingjia ka la jia wat hapdeng ki jingpyrshang da baroh ar ki sorkar jylla ban pynkiar ïa ki nongshong shnong ba kin ïadon bynta ha ki kam ïakajia kiba lah ban poi sha ki jingïaumsnam.
“Baroh ar kynhun ki pulit ki la pynkiar ïa la ki jong ki nongshong shnong, ba kim dei ban leh ki kam thombor bad ban long kiba jai jai bad ban shah ïa baroh ki jingtreikam ban pyndep ha ka lynti kaba suk ba saiñ hynrei katba kane ka jingpynkiar ka dang ïaid, ka jingbun u paidbhur ka la nangbun, bad ka la mih ka jingïapynibor hapdeng ki ar kynhun na baroh arliang bad ha kane ka jingïapynibor uwei u briew u la duh ei ïa la ka jong ka jingim,” u la ong.
U Sangma u la pynshai ruh ba kane ka jingïapynibor ka la mih na ka jingjia hapdeng ki para paidbah, khlem da donkti ki pulit. “Ha kawei ka liang, kam shym la don kano kano ka jingleh tohmet kaba la shim ha kane ka jingjia,” u la bynrap.
U Myntri Rangbah u la kyrpad ïa ki nongshong shnong ban ïatreilang bad ki jingpyrshang jong ki ar tylli ki sorkar ban shem ïa ka jingpynbeit kaba suk ba saiñ halor kane ka jingïakajia pud.
“Ngi kyrpad ïa ki nongshong shnong jong ngi na baroh arliang ba kin shah ïa ki ar sorkar ban don bynta ha ka jingïakren bad lada don kino kino ki jingeh ki don ha ki shnong bad lada ki paidbah ki ïatreilang bad ban ïakren iwei ïa iwei pat ngin sa lah ban pynbeit ïa kane ka jingeh,” u la ong.
Haba ïathuh ba ki kam kiba la ïaid haduh mynta ban pynbeit ïa ki jingïakajia u pud u sam, u Sangma u la ïathuh ba 6 tylli ki jaka kiba don jingïakajia na ki 12 tylli la lah ban pynbeit.
“Kumba 52 snem ba la leit ym don kano kano ka sorkar kaba shimkhia ban sdang ïa kane ka kam. Kadei tang ha ka por jong ngi ba ngi sdang ïa kane ban pynbeit ïa ki 6 tylli ki jaka ïakajia bad kiba dang sah mynta ki dei sa 6 tylli bad ngi dang pynïaid shakhmat ruh ïa kane ka kam ban ïoh pynbeit da ka lynti kaba suk ba saiñ ban ïakren ïa kane ka kam ïakajia pud,” u la bynrap.
“Ha ki 52 snem kiba la leit, la don kumba 27 tylli ki jingïalang ha ka kyrdan jong u CM bad u CS bad ha kine ki jingïalang kiba la dep ngi la rai ban pynneh ïa ka status quo. Kumta u Dr Himanta Biswa Sarma bad manga dalade ngi la shim ka rai kaba shai ha ryngkat bad ka sorkar pdeng ba ngin ym don shuh kane ka status quo halor ka nongrim ki jingïalang. Lada ngi ïakynduh, ngin kynduh ha ryngkat bad katto katne ki rai,” u la ong da kaba bynrap, “Ngi leit da ka jingmut jingpyrkhat kaba shai bad la pynjlan ruh ïa ki lynti jingïasyllok. Ngi pyndon bynta lang ïa ki nongshong shnong, ngi pynlong ki jingïalang paidbah, bad la kylli ruh ïa ki paidbah la ki kwah ban don ha Meghalaya ne Assam. Kane kam ju kham jia naba bun sien ki sorkar ki kwah ban shim rai ha la ki kamra hynrei ban pyndon bynta bad ki paidbah ka thaiñ bad baroh artylli ki sorkar jylla bad ki nongïalam ban lah ban pdiang ïa ka mon jong u paidbah bad kane kadei kaei kaba ngi la leh ban pynbeit ïa ki 6 tylli ki jaka ba ïakajia.”
U Sangma u la pynbna ba baroh ar ki sorkar ki la rai ban shim lang ruh ïa ka mon ki paidbah ban pynbeit lang ruh sa ïa kiwei pat ki 6 tylli ki jingïakajia pud kiba dangsah.
“Ngi dang pyrshang ban leh da kajuh ka lynti ha kiwei pat ki 8 tylli ki jaka bad ngi kwah ruh ban pyndon bynta lang bad ki paidbah. Ngi don ki sub-committee kiba ju ïakynduh ïa ki paidbah manla ka por. Ngi don ki jingïalang ban sngap ïa ki paidbah, hynrei kam long pat kaba suk. Kaei kaba khlem lah pynbeit la 52 snem, ngi dang pyrshang ïa kaba bha tam ban pynbeit ïa ka kam,” u la ong da kaba banjur biang ba ka jingïeng jong u ka long kaba shai, “Ngi don hangne ym ban leh da ka bor.”