Shillong, Nailar 04: U Myntri ka tnat Pule puthi ka sorkar jylla u Rakkam A Sangma u la ai khublei ïa M Langstang, uba dang pule ïa ka Class XII na North Liberty Higher Secondary School ha Jowai, halor ka jingïoh lad jong u ha ka Joint Entrance Examination (JEE) 2025 bad uba la ïoh ka lad ban rung ha Indian Institute of Technology (IIT) Madras da kaba ong ruh ba donkam ïa ki samla pule ban ïakhun ïa ki eksam bapher bapher.
Haba kren sha ki lad pathai khubor ha ka sngi Nyngkong, u Sangma u la pynpaw ïa ka jingsngew sarong halor kane ka jingkynjoh jong u da kaba ong “Kane ka dei ka jingkynjoh jong baroh lang kaba kynthup ïa ka jingtrei shitom jong ki kmie ki kpa, ki nonghikai bad ka sorkar.”
U la kdew ruh ba ha u snem ba la dep u Jonathan Sangma u la pyndep ïa ka JEE da kaba ïoh ïa ka mark kaba heh ha ka ri, ha kaba kane ka la pynlah ïa u ban ïoh rung ha ka jingpule IIT Bombay.
U Sangma u la ong ba kane ka dei ka jinglah ka sorkar ban wanrah ïa ka NCERT textbook, ha kaba kane ka la wanlam ïa ka result kaba bha ha national exams kum ka National Eligibility cum Entrance Test (NEET) bad JEE.
“La ïathuh ïa nga da ki nonghikai ba kane ka jingshim rai jong ka sorkar ki la pynpaw ïa ka jingsngew kmen. Bad kane ka la wanrah ka jingmyntoi ba kin lah ban ïakhun ïa ka NEET, ne ka JEE bad kumba long mynta ki samla pule ki la lah ban ïakhun ïa ki eksam bapher bapher,” ula ong.
