Sngew samrkhie ba mynta ka Congress ka ong ban wengnoh ka jingkyrshan ha KHADC, ong ka UDP

Shillong, Nohprah 09: U Nongïalam ka United Democratic Party (UDP) bad uba don ruh ha ka liang pyrshah hapoh ka KHADC u Bah Titosstarwell Chyne ha ka sngi Nyngkong u la ong ba ka jingshim rai jong ka Congress ban wengnoh ïa ka jingkyrshan jong ka Executive Committee ba la ïalam da ka NPP tang hapoh ki ar bnai sha ban long ka elekshon ADC ka long kaei kaei kaba sngew sam rakhe “.
Haba kren sha ki lad pathai khubor u Bah Chyne u la ong ba ka Congress ka don ha kti ha kjat bad ka NPP ban pynneh ïa ka EC kaba lai snem shiteng jong ka EC ba la ïalam da ka UDP ha KHADC.
“Kane ka dei ka jingsngew sam rkhe hakhmat ki paidbah. Balei mynta ki pynbor ban wengnoh napoh ka EC ha kaba ha kaba sdang ki la don bynta ban pynhiar shuki ïa nga bad ïa ka EC hapoh ka jingïalam jong nga,” u la ong.
“Ka long kaei kaei kaba sngew sam rakhe kine ki kwah ban pynbeij ïa ki paidbah. Ki pyrkhat bad ki nongshong shnong kidei kiba beij. Kane ka jingong ban wengnoh napoh ka EC ka dei tang ka jingïalam bakla ïa ki paidbah,” ong u Bah Chyne da kaba bynrap ruh ba ki paidbah kin sa ai ka jubab kaba biang bha ha kine ki elekshon ban wan.
Lah ban ong ba ki arngut ki MDC ka Congress ki lah ban wengnoh ïa ki jingkyrshan jong ki napoh ka EC ba la ïalam da ka National People’s Party (NPP) hapoh Khasi Hills Autonomous District Council (KHADC) ha shwa ban long ki elekshon MDC na ka daw ka jingshah pynbor ha ki nongtrei ka party bad kumjuh ruh na ka AICC.
Ki tyllong khubor ki ïathuh ruh ba kane ka jingweng ïa ka jingkyrshan kan sa long shen hadien ba la pynthikna da u working president bad u deputy chief executive member u Bah Pynshngainlang N Syiem na ka daw ba un ïakhun biang ïa ka elekshon na ka party.
“Kane ka jingshah pynbor ka la pynlong ïa u Bah PN Syiem ban wengnoh ïa ka jingkyrshan napoh ka EC ba la ïalam da ka NPP hapoh KHADC,” ong ka tyllong khubor.