Sngew pyrshah ki dkhot Balang Presbyterian ba kynthup ïa ki jaka ka KJPA ha ka Master Plan ka sorkar
Shillong, Naitung 01: Kiba bun ki dkhot ka Balang Presbyterian, ki la pyndonkam da ka Social Media kum ka facebook, whatsapp bad kiwei kiwei ban pynpaw ka jingsngew pyrshah ïa ka jingpaw jong ka ïingmane ka Balang Presbyterian (English Service) ha Khyndailad ha ka Master Plan jong ka sorkar na ka bynta ka jingpynkylluid ïa ka nongbah Shillong.
Ki jaka kiba kham paw jong ka KJP Assembly kiba don hapdeng Sor ki long ka ïingmane English Service ha Khyndailad kaba la don palat spah snem naduh ka por jong ki Missionary na Wales bad ka don ruh ka jaka ha Central Ward, IGP ha kaba la ju pyndonkam da ka MLCU mynshuwa, nanggta ka New Hope Centre bad mynta la shna ïa ka ophis treikam jong ka Khasi Jaiñtia Presbyterian Assembly, nangta ka don ruh ka jaka treikam jong ka Meghalaya Rural Bank bad kiwei kiwei ki de ki ophis treikam.
Kane ka jingthmu jong ka sorkar ban kynthup lang ïa ki jaka ka KJPA ka la paw ha ki kot khubor mynta ka sngi lyngba ka Master Plan jong ka Urban Affairs Department.
Kane ka Master Plan jong ka sorkar ne ka tnad pynroi Sor ka la paw de kiwei kiwei ki jaka na ka bynta ban pynkylluid ïa ka nongbah Shillong.
Ym shym la ïoh jingtip pat lano kane ka Master Plan kan treikam.
Hynrei kiba bun ki dkhot ka Balang, kynthup ruh ïa ki katto katne ki nongïalam ki la pynpaw ba kim ïahap satia ïa kane ka jingthmu ka sorkar, namar ba ka jaka kaba paw ha ka Master Plan kadei ka jaka kaba la don ne ïoh pateng naduh palat shispah snem lane kata ka Heritage Site.
“Ngin nyn ailad satia ïa kane ka jingthmu ka sorkar kaba ka jingthmu ka long ban pynkylluid ïa ka nongbah Shillong, hynrei ym tip pat ha kano ka rukom, namar ba kane ka sorkar ka thmu shim jak atang ban ïoh pynkylla Shopping Mall kumba ka la leh ïa ka MTC Bus Stand ha Khyndailad”, la ong uwei uba la thoh ne post ha Facebook.
Kiba bun kiwei pat ruh kynthup ïa ki nongïalam Balang kiba la pynpaw ba ka KJP Assembly da lei lei kam dei ban ai ïa kane ka jaka kaba dei ka nongtymmen jong ki Missionary.
Haba la pyrshang kylli ïa kane ka na ki Pastor ka Balang Presbyterian ki la ong ba kim pat ïoh jingtip eiei, hynrei ki shu ïohi ha ki kot khubor.