Sngew khia ka KSU Narpuh bym shim khia ka sorkar bad ki nongmihkhmat ban phah maramot kloi ïa ka jingkieng ha Lahaleiñ

Khliehriat naitung 8: Ka Khasi Students Union Narpuh Circle, lyngba u General Secretary u samla Sanatomba Bamon, ka pynpaw ka jingsngew khia halor ka jingbym shim khia kloi ka sorkar bad ki nongmih khmat ka thaiñ ban phah maramot kloi ïa ka jingkieng ïaid kali ha khappud ha shnong Lahaleiñ kaba la pra bad jingjulor noh ploiñ ha ka jingshah rong noh ha ka u, ka jingjulor kane ka jingkieng shisha ka la buh jingeh haduh katta katta ïa ki nongleit nongwan kiba na ki thaiñ khappud.
Na ka liang ka seng ka kyntu jur ruh ïa u MLA ka thaiñ u bah Shitlang Pale bad u MDC u bah Emlangki Lamare ba ki dei ban leit ban jurip ïa katei ka jingkieng ha ka wah Ïakang kaba don ha shnong Lahaleiñ khnang ba kin dup ïohi da ka jong ka khmat ïa ka jingjulor bad jing pra ka jingkieng bad kum ka seng ka kwah ruh ba kum ki nongmihkhmat ki dei ruh ban da sngewthuh lem ïa ka eh ka shon jong ki paidbah jong katei ka thaiñ kiba ïakynduh jingeh ha ka leit ka wan.
Ha kajuh ka por ka seng ka kyntu ïa ka sorkar ba ka dei ban bthah ïa ka tnat CPWD ba kan shim khia ban maramot noh mardor ïa ka jingkieng kaba long katkum ka shithih ba la dep phah da u Deputy Commissioner ka East Jaiñtia Hills District, u Abhilash Banarwal, IAS.
Kum ban shu pynkynmaw, katei ka jingkieng ïaid kali kaba don ha shnong ha khappud ha Lahaleiñ myn ha ka 6 tarik ka la dkhut bad pra bad shah rong noh ha ka um kaba heh bad kaba tuid lat lat, ki kali kiba dang wan na ki jaka ïew kiba kit ïa ki briew bad ki jingkit ki la sahkut ha katei ka bynta bad kim lait shuh ban ïaid sha shiliang, ki briew ki la shu shna jingkieng hi da ki dieng tylli na kawei ka jaka tang ban lait ban jam sha shiliang, ki paidbah kiba dang wan jingwan kiba kynthup naduh ki rangbah, ki kynthei ki khynnah hapdeng ka jingther u slap bad hapdeng ka jingma ki la shu ïa par bad ïaid suki suki da ka kjat na kitei ki dieng tylli ba la pun na shiliang sha shiliang, ha ryngkat ka jingsyier mynsiem ki la iaid tang ban lait sha shiliang ban poi sha shnong.
Ha kaba ïadei bad kane, na ka liang u Deputy Commissioner ka East Jaiñtia Hills District, u Abhilash Banarwal, IAS mar mar hi u la shim khia bad u la phah da ka jingthoh sha u Chief Engineer jong ka tnat Central Public Works Department (CPWD), Shillong bad u la bthah bad ban jur ba ka tnat ka dei ban shim khia noh ban maramot noh mardor ïa katei ka jingkieng kaba don ha ka wah Ïakang hajan Lahaleiñ kaba la jot bad pra na ka daw ka jinglynshop ka um ha ka por ba jur palat u slap, u la bthah ruh ïa u Chief Engineer ba u dei ruh ban pynpoi ïa ki kaiphot halor ki kam ba ki leh ban ba kin sa leh ha kaba ïadei bad ka jingmaramot ïa katei ka jingkieng ha khappud.
La ong ba na ka liang ka seng ka kwah ba na ka liang ki nongmihkhmat ruh ba kin shim khia ïa kane