Sngew khia ka EJNC-KU ïa ka jingbym don paiñkhana paidbah bad jingduna ka roi ka par ha EJHD

Khliehriat Naitung 5: Ka East Jaiñtia National Council Khliehriat Unit, ka pynpaw ka jingsngew khia halor ka jingbym biang ki paiñkhana paidbah ha ka sor Khliehriat bad ong ba ka jingdon ki paiñkhana paidbah khamtam ha ki jaka sor ha Khliehriat ka long kaba donkam haduh katta katta khnang ba kan kham pynsuk ruh ïa ki paidbah bad ha kajuh ka por ban wanrah ruh ïa ka khuid ka suba ha sor Khliehriat.
Ha kajuh ka por ka seng ka pynpaw ruh ka jingsngew khia halor ka jingduna palat ka roi ka par ha East Jaiñtia Hills District khamtam ha Khliehriat kaba dei ka headquater jong ka district.
Halor kitei ki mat, ki dkhot ka seng mynta ka sngi hapoh ka jingïalam u General Secretary ka EJNC Khliehriat Unit, u samla Daiamon Bareh, ki la leit ban ïakynduh ïa u Deputy Commissioner ka East Jaiñtia Hills District, u Abhilash Banarwal bad ïakren halor kumno ban wanrah ïa ki painkhana paidbah ha Khliehriat bad kumjuh ruh ban kyntiew ïa ka roi ka par ha Khliehriat bad ha ka district hi baroh kawei, ha kajuh ka por ka seng ka la buh da ka jingthoh hakhmat u Deputy Commissioner bad kyntu ïa u ba un sngewbha ban shimkhia lem halor kitei ki mat ki ban long na ka bynta ka jingbit jingbiang ki paidbah.
La ong ruh, ba ha kaba ïakren bad ki dkhot ka seng, u Deputy Commissioner, u la ong ba un sa ïakren bad ki nongtrei jong ka tnat Swachh Bharat kiba dei peit ïa ka Engineering Procuremental Construction (EPC) bad yn sa peit ruh haduh katno tylli donkam ban shna ïa ki paiñkhana paidbah ha sor Khliehriat bad kumjuh ruh u Abhilash Banarwal, u la ong ba un sa buh ruh da ka jingthoh sha ka National Highway Authority of India bad sha ka tnat Swachh Bharat Mission ban pynlong kawei ka jingialang ryngkat lang bad ki dkhot ka seng ban iaphylliew jingmut halor shibun kiei kiei kiba dei bad ka khuid ka suba ha sor Khliehriat namar ka long shisha kaba donkam ban wanrah bad ban pynneh pynsah ïa ka khuid ka suba