Khliehriat, Risaw 17: Ka Jaiñtia National Council Khliehriat Circle, mynta ka sngi ka la leit buh da ka jingthoh ne ka dorkhas hakhmat u Deputy Commissioner ka East Jaiñtia Hills District bad ka la pynpaw ka jingsngew khia kaba jur namar ka jingsniew ka surok national highway- 6 ha sor bah Khliehriat kaba dei ka Headquater jong ka District bad ruh ka jingjur palat ka jingmih khyndew pum pum na ka surok.
Katkum ka dorkhas ba la soi da u General Secretary jong ka JNC Khliehriat Circle, u samla S.B. Sumer ka seng ka la pynpaw ba ka jingsniew ka surok national highway ha Khliehriat bad ka jingmih khyndew pum pum ka buh jingeh bad buh jingma ïa ka koit ka khiah jong ki paidbah kiba leit ba wan bad khamtam kito kiba shong dukan ha rud ka surok bad kim lah shuh ban tehlakam ïa ka jingjur ka jing pum pum khyndew ba la rung wat shapoh ki dukan jong ki bad ka seng ka la sakhi ruh ba wat ki mar ki mata kiba don ha ki dukan ruh ki la sop da ka khyndew pum pum.
Na ka liang ka seng ka kyntu ïa u Deputy Commissioner ba un sngewbha ban peit lem halor kane ka jingeh ba ki paidbah ki iakynduh khnang ban ïada ïa ki paidbah ban lait na ki jingpang jingshitom na ka daw ka jing jur ka jingpum pum khyndew
Lyngba u kyrwoh ba la phah sha ki pathai khubor ka seng ka pynpaw bad ong ruh ba “Ngi tip skhem ba ka koit ka khiah ka long kaba donkam haduh katta katta bad ngin nym lah da leilei ruh ban shu ïa iaid ryngkat, im ryngkat bad une u pum pum khyndew ba mih na ka surok NH-6 ha Khliehriat, kumta na ka liang ka seng Jaiñtia National Council Khliehriat Circle ngi kyrpad jur ïa ki bor synshar District jong ka East Jaiñtia Hills District ban leh ïa ka kam ba donkam khnang ban pynduh noh ïa une u pum pum khyndew ban theh um man la ka sngi ha ki bynta jong ka surok bad ruh ban phah maramot bha ïa ka surok ha Khliehriat kaba la jot la julor”
