Sngew khia jur ka HANM-JZ halor ka jingkordit ki paidbah namar ka jingleh mynthi ka sorkar bad ka NHAI ban maramot ïa ka surok NH-6

Khliehriat nailar 1:Ka Hynñiewtrep Achik National Movement Jaiñtia Zone, ka pynpaw ka jingsngew khia kaba khraw halor ka jingleh mynthi bad leh bym salia ka sorkar bad ka National Highway Authority of India ban maramot pynbha ïa ka surok national highway ha East Jaintia Hills District, kaba la jot rathai, namar ka jinsniew palat ka surok ka la buh jingeh haduh katta katta ïa ki paidbah kiba ïaid lyngba na kane ka national highway.
U President jong ka HANM Jaiñtia Zone, u bah Shaniahlang Suchen u la dawa na ka sorkar bad na ka NHAI ba ka dei ban pynshai paidbah halor kaei ka daw ba ka slem palat ban maramot ïa katei ka surok “Ngi kum ka seng bad kumjuh ruh baroh ki paidbah ngi sah ha ka umdum ha kaba ngim lah ban sngewthuh shuh kaei ka daw ba ka sorkar bad ka National Highway Authority of India ka pynslem palat haduh katne ban maramot ïa ka surok National Highway-6 ha East Jaiñtia Hills District, ngi sngew khia namar ka jingnsiew palat ka surok ka ju wanrah ïa ka jingdheng kali kaba ju pynkotdit haduh katta katta ïa ki paidbah nongleit nongwan, kaba sngewsih ruh ka long ba ki don ruh ki khynnah rit bad kumjuh ruh ki kali kit nongpang kiba ju sahkut lang ha kane ka jingdheng kali kaba bun-bun kynta, hato ka sorkar kam don jingsnewlem shuh mo ïa ki paidbah” pynpaw u bah Shaniahlang Suchen.
U la ong ruh ha ki khyndiat bnai ba la leit ka East Jaiñtia Hills District, ka la shah ktah jur haduh katta katta ha ka jingwan lynshop ki bor ka mariang, haduh ba ki lynti ki syngkien, ki jingkieng ki la dkhut bad ki la jot la pra, hynrei kat haduh mynta ruh ym shym la ïohi dak eiei ba ka NHAI kan maramot ïa ka surok bad ka CPWD ruh kumjuh kaba pynslem ban shna ïa ki jingkieng kiba la jot la pra ha ki thaiñ khappud.