Khliehriat, Nailur 11: ka Federation of Khasi Jaiñtia and Garo People East Jaiñtia Hills District, myn ha ka sngi thohdieng ka sngi ka la leit ban buh da ka jingthoh ha khmat u Deputy Commissioner ka East Jaiñtia Hills District bad pypaw ka jingsngew khia kaba khraw halor ka jingsniew palat ka surok national highway-6 ha East Jaiñtia Hills District, kumjuh ruh ki la pynpaw ka jingsngew khiah ba bun ki jingkieng ruh ki la dap da ka thliew ka syar, da ka ktieh ba jyrsieh kaba lah ban buh jingma wat ïa ki jingkieng ruh bad kumjuh ruh ki buh jingma ïa ka jingim briew.
Katkum ka shithi ba la soi da u President FKJGP-EJHD u bah M.Suting bad u General ecretary u bah D.Sumer, la pynpaw shuh shuh ruh ba ka jinglong jingman ka surok national highway hapoh ka district ka buh jingma jingsyier ïa ki nongleit nongwan, ka jinglong ka surok ruh ka bym i dei shuh kum ka surok bah hynrei ka la i kum ka surok khlaw kaba dap tang ka thliew, ka ktieh ba jyrsieh ha kaba ka tnat ba dei peit ruh kam shym la shim khia satia ban maramot ïa ka surok “Ka long kaba i sangsot shisha ïa ki paidbah kiba ïaid lyngba na kane ka surok national highway kiba ju ïakynduh jingeh man ka por.
Ka seng ka la pynpaw ruh ba wat ki jingkieng kiba don ha kane ka surok national highway khamtam kito ki jingkieng kiba naduh Lumshnong shaduh Sonapur ki la dap da ki thlew kiba heh, don ki bynta ba dap tang da ka ktieh kaba jyrsieh, kiba buh jingma bha ïa ki nongñiah kali bad nong shong kali kiba dei ïaid na kane ka surok kynthup ki kali kiba na kiwei kiwei ki jylla bad ki kali kiba napoh ka thaiñ bad kito kiba na kiwei kiwei ki jylla ruh kiba ju ïaid lyngba na kane ka surok NH-6.
Na ka liang ka seng ka kyntu jur ïa u Deputy Commissioner bad khmih lynti ba un shim khia shuh shuh ha kaba ïadei bad kane ka surok namar ka la buh jingeh palat ïa ki paidbah.
Ha ka jingïakren bad u Deputy Commissioner, u Abhilash Banarwal, IAS, kitei ki nongïalam jong ka FKJGP na East Jaiñtia Hills District, ki la kyrpad biang ïa u ba un shim khia biang ban peit lem ha kaba ïadei bad ka jinglong jingman ka surok, khamtam ban phah shna bha ïa ki jingkieng kiba ap jingma ïa ki nongleit nongwan bad kumjuh ruh ban lait na ka jingjot jingpra ki jingkieng, namar lada ki jot ki pra ki jingkieng kan sa nang buh jingeh shuh shuh ïa ki paidbah.
La ong ba na ka liang u Abhilash Banarwal, u la ïathuh bad pynshai ba u la shim khia bha ha kaba ïadei bad ka surok national highway ha kaba man ka por u la phah ki jingthoh sha ka National Highway Authority of India ba kan maramot bad shna bha noh ïa ka surok bad ki jingkieng, hyrei na ka liang ka NHAI kam shym la sngap satia, u la ong ba ma u ruh ba kum u khlieh jong ka District u don ka ka jingsngew khia halor kane bad ong ba shen un sa ïakren biang bad ka NHAI.
