Sngew dom ki MDC ka VPP ba pynkut jubor ïa ka Dorbar Lyiur khlem ïoh kylli jingkylli

Jowai, Naitung 24: Ki MDC ka Voice of the People Party (VPP) ki la pynpaw ka jingsngew dom ïa u Deputy Chairman ka JHADC u ma Wailad Dameshwa Siangshai (MDC) uba pynïaid ïa ka Dorbar mynta ka sngi, halor ka jingbym ïohlad jong ki ban ïashim bynta ha ka kynta kylli jingkylli namar la pynkut noh ïa ka Dorbar mynta hi ka sngi.
Kine ki MDC ka VPP hadien bala kut ka jingïalang ki la leit tur mar mar sha ka kamra jong u Deputy Chairman ka JHADC ban pynsngew ïa kane ka jingleh jong u khlem da ïaid katkum ki kyndon ne ki Rules pynïaid Dorbar, da kaba kyntu ba kum kine kim dei shuh ban jia nangne shakhmat.
Ha ka jingkren sha ki lad pathai khubor kitei ki MDC naduh u nongïalam ka liang pyrshah u ma A.A Shullai ula pynpaw ka jingsngewsih kaba khraw eh, wat ïa ki Motion kiba ula thmu ban wanrah hynrei la pynduh pyndam ïa ki bad kane ka long kum ka jingleh donbor.
Katkum ka rules of Business Session u ong dei ban bteng ïa ka dorbar ha ka sngi ba bud ban pyndep ïa ki jngkylli, ula ong ki katto katne ki MDC ka liang pyrshah ki la ïoh ban kylli jingkylli tang mar lai tylli bad kiba buh hi ki MDC kim ïohlad ban shim bynta bad la pynkut jubor ïa ka Dorbar.
Ka kong Deiwipaya T. Tongper ka ong kane ka jingpynkut jubor ïa ka Dorbar Lyiur ka long da ka jingbthah u Chairman ïa u Dy. Chairman, ka la ong ki don shibun ki jingkylli kiba ka kwah ban ïoh jingpynshai kawei halor ka jingujor Ejahar ka HITO ïa ka Sonapur Weight bridge bad ka Ratacherra forest beat office, da kaba ong kane ka dei ka jingpynbeit shwa jong ka liang synshar ban pynkut noh ïa ka jingïalang.
‘Lada ki leh kumne ka mut aiu ba ki pan ïa ki jingkylli ki Resolution bad ki Motion’ ong ka kong Deiwi bad kane ka jingshah pynduh ïa ki 6 tylli ki jingkylli jong ka ka long kumba pynduh mynsiem ïa ki kum ki nongmihkhmat.
U ma Jamshaphrang Pohtam u ong kane ka jingleh ka long kumba pynkheiñ ïa ki Rules ki kyndon, lada ngim ïoh lad ban kren hapoh ïing Dorbar kumno ngin leit kreh sha surok, u pynrem jur ïa kane da kaba ong wat hapdeng ka jinghiar bad hiran ka Council hynrei la khanglad pynban kumne.
U ma Nehimaia Lamare ula ong na ka liang ka kynhun liang pyrshah ka pynrem jur ïa kane ka jingpynkut jubor ïa ka Dorbar, namar wat ïa ka Resolution kaba u wanrah ka la shah pynduh noh, u ong kane kam long ka jingkwah burom haba wanrah Resolution hynrei ka long ka jingbha ïa ki paidbah ka jaitbynriew.
‘Sepei ki jingpynkhreh bad ki jingpule kot na ka bynta ki issue ka jaitbynriew hynrei nga khlem ïoh lad ban pynsngew ïa ki lai tylli ki jingkylli’ ong u Daemi Liam. Shuh shuh u ong ha kaba ïadei bad ka jingkylli kaba ïadei bad ki jaka khappud wat ka Council ka la kynnoh pynban sha ka sorkar jylla (state border) bad kane ka pyndkot ïa ka bor jong ka Council. Shuh shuh ula ong kane ka jingpynkut ïa ka dorkar ka long kaba lehraiñ ïa u Dy. Chairman. Katba u ma Gresentus Susngi ula ong na ka daw tang katto katne ngut ki MDC ki la shim ïa ka bor ha kti la pynkut ïa kane ka Dorbar.