Shillong, Jylliew, 07: U Nongïalam jong ka All India Trinamool Congress, Meghalaya u Dr. Mukul Sangma uba dei ruh u Nongïalam jong ka Liang Pyrshah ha ka sngi Baar u la smai ba un ïakhun pyrshah ïa ka jyrsieh bamsap bad ïa ki bor kiba wanrah ïa ka jingsngew ïapher jaidbynriew.
Ïa kane, u Dr. Mukul u la pynpaw ha ka jingïalang kaba u la lum ïa ki nongïalam bad ïa ki nongkyrshan ha ïingsah jong u ha Ampati, East Garo Hills ban pynkhlaiñ ïa ka TMC ha Ampati Constituency.
Ha kane ka jingïalang, u Dr. Mukul u la kular sha ki paidbah halor ka nongrim ba ka TMC ka la ieng hapoh ka jylla ban pyllait ïa ki na ki jingeh kiba bun bad ban wanrah ïa ka lawei kaba shai.
“Ka TMC Meghalaya ka la rai ban ai ka jingshakri kaba bha sha ki paidbah nongshong shnong ka jylla Meghalaya bad kan ïai bteng ban ïakhun na ka bynta ka hok jong ki paidbah pyrshah ïa ka bamsap bampong bad ïa ki bor kiba wanrah ïa ka jingsngew ïapher jaidbynriew,” ong u Dr. Mukul.
Ha kane ka jingïalang, ki nongïalam ki la ai jingmut, ki la buh jingkylli bad ki la pynsngew ruh ïa ki jingeh ba ki mad.
La ïashim bynta lang ha kane ka jingïalang da u District Coordinator u Malangcourt Sangma, u Vice President jong ka Block Committee u Hamay Koch bad ka President jong ka Block Committee ka Grace Sangma.
Nalor ki nongïalam jong ka TMC ha ka District Level, da ki spah ngut ki paidbah na Ampati Assembly Constituency bad South-West Garo Hills ki la poi sha kane ka jingïalang.
Ka TMC Meghalaya haduh mynta ka dang ïai bteng ban rung sha ki kyndong kynshrot jong ka jylla ban pynsngewthuh ïa ki paidbah halor ki nongrim treikam.
