Slem palat ka jingpyntrei ïa ka Engineering College ha Ampati, ong u Dr. Mukul ha Ïing Dorbar

Shillong, Nailur 11 : U Myntri ba peit ïa ka tnad Pule Puthi ka Jylla u Rakkam A Sangma ha ka sngi Palei u la pyntip ba ka sorkar ka buh thong ban ïoh pyndep noh kham kloi ïa ka Engineering College ha Ampati.
Kane ka jingkular u Myntri ka dei halor ka jingkylli kaba la wanrah da u Nongïalam ka Liang Pyrshah ha Ïing Dorbar Thawain ka Jylla u Dr. Mukul Sangma uba la kylli halor ka jingïaid ka jingpyntrei ïa ka Engineering College ha Ampati.
Na ka liang u Myntri u la pyntip ruh ba ka jingïaid ka kam mynta ka la poi sha ka 25 persen ha kaba ka jingpynlut na bynta kane ka la poi sha ka 15klur haduh mynta.
“Nga kular ba ngin pyntikna ba yn pyndep noh ïa kane ka Engineering College,” u la ong da kaba kubur ruh ba ka la slem shisha ka jingpyntrei ïa kane ka college. Na ka liang ka MLA jong ka Ampati, ka Miani D Shira ka la wanrah lang ïa ka jingsngewkhia halor ka jingbym don ka surok kaban poi sha ka Engineering College.
Halor kane ruh u Myntri ka tnad Pule Puthi u la ong ba donkam ïa u kontraktor ban shna ïa ka surok ba shipor hadien ba ka surok kaba rim ka la pynjulor noh ha u slap. U ong ruh ba ka sorkar kan sa shimkhia na ka bynta ban phah shna noh ïa kane ka surok.