Shillong, Nailar 19: Ka jingslem jong ki nonghikai SSA ka jylla Meghalaya ban ïoh ïa ka tulop jong u bnai Naitung 2024 kadei namar ba ki Nongtrei lane ki SSA Non-Teaching Staff ki dang don hapdeng ka jingïakhih.
Ïa kane la pyntip da u President ka Meghalaya SSA School Teachers Association (MSSASA) u Bah Aristotle Rymbai bad ula ong ba ki Non-Teaching Staff kim don hok ban pynduh ïa ka tulop jong ki nonghikai.
Haba kren sha ki lad pathai khubor ha Shillong Press Club u Bah Aristotle ula ïathuh ba ha ka 6 tarik Nailar, ka MSSASA ka la leit ïakynduh ïa u State Project Director u Swapnil Tembe uba la ïathuh ba ka jingslem ban pyllait ïa ka tulop kadei namar ka jingïakhih ki SSA Non-Teaching Staff.
Shuh shuh u Bah Aristotle ula kam ba ka Sorkar Jylla ka la dep mang ïa ka tyngka ban siew tulop jong u bnai Naitung ïa ki nonghikai SSA hynrei namar ba ki SSA Non-Teaching Staff ki dang don hapdeng ka jingïakhih, ka pisa haduh mynta kam shym la poi ha ki Bank Account.
“Ki Nongtrei lane ki SSA Non-Teaching Staff ki don ïa ka hok ban ïakhih hynrei kim don pat ka hok ban pynduh ïa ka tulop jong ngi,” ong u Bah Aristotle.
U Bah Aristotle ula ong ba ka Association kam don eiei ban kynthoh halor ka jingïakhih ki SSA Non-Teaching Staff hynrei ula kynnoh pat ba kane ka jingïakhih ka la pynduh ïa ka hok jong ki nonghikai.
“Kane ka long kum kaei kaei kaba kila pynkheiñ ïa ka Provision jong ka Article 21 bad Article 300 (a) kaba la kren shai ba kino kino ki nongshong shnong ka Ri India kim don hok ban pynduh ïa ka tulop jong kiwei pat,” ula ong.
Shuh shuh u president ka MSSASA ula ong ba ka Association ka dawa na ka Sorkar ban wad ki lad lynti ban pyllait ïa ka tulop jong u bnai Naitung kaba dei hok jong ki nonghikai.
Ha kawei pat ka liang ka MSSASA ka pynrem jur ïa ki katto katne ki briew kiba kam ïalade ba kidei ki dkhot ka Association ban ong ba kam lei lei lada slem ka tulop kumba 1-2 bnai na ka bynta jong ki nonghikai.
