SHILLONG, Risaw 17: Ka samla Rifiness Warjri kaba la shah jied dang shen ban leit kiew ïa u Lum ba jrong tam ha ka pyrthei, kata u Lum Everest, mynta ka la hap ban pynkhreh bha ïalade ha kaba kan hap ban ïashim bynta ban pyndep ïa ki jingshah hikai kiba ha-rukom khnang ban pyntbit lyngba ka prokram ai jinghikai ban sa long shen shuwa ban leit kiew ïa utei u Lum ba kynjang.
Lah ban kdew, ka samla Rifiness Warjri, ka khynnah samla kaba dang pule ïa ka Bachelor of Science ha ka sobject Botany ha St. Anthonys’ College, Shillong dang shen ka la mihkhmat ïa ka jylla Meghalaya ban don bynta ha ka jingleit kiew ïa u lum Abi Gamin, u shnat lum jong u lum Himalaya uba don ha Chamoli District jong ka jylla Uttarakhand.
Ha ka jingïakren bad ki lad pathai khubor ha ka sngi Palei ka 17 tarik u Risaw, 2024, ka samla Rifiness ka la pynpaw ba ka jingleit kiew ïa u lum Abi Gamin uba jrong 7,355 mitar ne 24,130 phut ka la long shisha kaba jwat.
Hadien ba ka la shah jied ban leit kiew ïa u Lum Everest, na ka liang jong ka samla Rifiness ka la pynpaw ba kane ka la pynkyndeh ïa ka mynsiem jong ka.
Ka jingshah jied ban leit kiew ïa u Lum Everst ka la pynskuin haduh katta katta ïa ka mynsiem jong Nga namar kane ka ai mynsiem kumba long ka Kong Wansuk Myrthong bad ka Kong Dolly Kharbhih kiba la jop ïa ka jingleit kiew ïa u lum Everest, la pynpaw ka samla Rifiness.
Kum ka dak ban ai mynsiem ka Meghalaya State Kickboxing Association ba la lamkhmat da u Working President u Bah Lorenzo Pearson Warjri ka la pynkup burom ïa ka samla Rifiness Warjri ha ka jingialang kaba la long ha Hotel Assembly, Shillong.
Khyndiat, shuwa ba ka Rifiness Warjri kan shah jied ban leit kiew ïa u Lum Everest, ka la sdang ïa ka lynti ïaid jong ka lyngba ka jingpyrshang (selection trial) ha Shillong, bad nangta ha Guwahati bad Delhi, nangne ka la shah jied ban leit kiew ïa u Lum Abi Gamin, u shnat lum jong u lum Himalaya uba don ha Chamoli District jong ka jylla Uttarakhand..
“Hadien ba la poi ha une u Lum, la phiah ïa Ngi ha ar tylli ki kynhun: ka Alpha bad ka Bravo. Nga la hap ha ka Team Alpha, ka kynhun ba nyngkong ban sdang ïa ka jingkiew. Hynrei, ka jingjur jong ka suiñbneng ha Camp 2, ngim shym la lah ban poi sha kliar namar ka jingsniew jong ka suiñbneng hynrei Ngi la lah pat ban poi 6,000 mitar, katba ka Bravo ka la poi kham shapoh, ha ka jing kynjan ba 4,000 mitar” la ïathuh ka Rifiness.
“Kane ka la hikai ïa nga ïa ki jingkordor ka sap kiew lum, ka jinglah ban ïashah, bad ka jingdonkam ban ïatreilang kum ka kynhun. Ban ïoh mihkhmat ïa ka jylla Meghalaya ka la pynlong ïa nga ban sngew sarong bad pynshlur ïa nga ban nang trei shitom bad tur shakhmat.”
“Mynta Nga dang pynkhreh na ka bynta ka jingleit kiew ïa u Lum Everest, nga sngewkyndeh bad kmen ban bteng ïa kane ka jingïaid lynti da kaba bteng ban pyndep ïa ki jinghikai pyntbit, ka la pynkut.
