“Siewspah ïa ka por bad long kiba phikir ha ka jingim khnang ban lait na ka jingshahteh mraw ha ki jingmlien ba sniew”: MDC

Mawkyrwat, Jymmang 13: Ka 8th South West Khasi Hills District Level Inter-School Athletic Meet 2022 kaba la sdang ha ka sngi balang mynta ka taïew bad ba la pynlong ha Saitsnad, Mawlangwir, South West Khasi Hills District ka la poi noh sha kaba kut noh mynta ka sngi ka 13 tarik u Jymmang, 2022 ha kaba ka Nativity Higher Secondary School, Mawkyrwat (NHSSM) ka la long ka lahduh napdeng ki 9 tylli ki skul kiba la wan ïashimbynta bad khur ruh haduh 21 tylli ki takma ksiar, 12 ki takma rupa bad 10 ki takma rnong.
Ha kane sngi ban pynkut, la wan ban pynhap pyrda da u bah Carness Sohshang, MDC jong ka Mawkyrwat Constituency u la long u kongsan ha ryngkat u bah S.C. Laloo, MSC, Additional Deputy Commissioner, South West Khasi Hills District kum u symbud kongsan, u bah A. Warbah, BADO jong ka Mawkyrwat C&RD Block lem bad ka jingdonlang ki nonghikai jong ki 9 tylli ki skul.
U bah Carness Sohshang haba kren kum u kongsan u ong ba ka kam ïalehkai ka dei kawei na ki jingïalehkai kilanmet kaba tei ïa ka met, kaba saiñdur ïa ka jingmut jingpyrkhat bad ka jinglong jong u briew bad ka long kaba donkam bha na ka bynta ka jingkoit jingkhiah ha baroh ki liang. U la ong ruh ba ha kine ki sngi kiba mynta ki briew ki la phai bad shimkhia bha ïa ka kam ïalehkai namar ka ai shibun ki jingmyntoi bad ha kajuh ka por ka long kum ka lad kamai jakpoh bad plie kam plie jam ïa ki khynnah samla.
Shuh shuh u la pynpaw ruh ïa ka jingkmen ban ïohi ba ki khynnah ki la ïashimbynta kaba naduh ka mynsiem da kaba kyntu ruh ïa ki ba kin don ka mynsiem ïaishah bad ka jingsngew shipara. Ha kajuh ka por u la ïaroh ïa ka jingtreishitom ha kaba ki la wanrah ïa ka nam ka burom bad ka jingsarong ïa ka dong ka thaiñ da ka jinglehbha jong ki ha ka Meghalaya Games 2022 kaba dang shu dep shen ha Nongbah Shillong da kaba ai mynsiem ïa ki ban leh bha shuh shuh ban poi sha ka thong nangne shakhmat.
U la ban jur ïa ka jingdonkam ban don ka jingangnud bad kiba tista ha kano kano ka thong ba ki ki thmu da kaba nang ban siewspah ïa ka por bad ban long kiba phikir ha ka jingim khnang ban lait na ka jingshahteh mraw ha ki jingmlien ba sniew. Namarkata, u la sneng bad kyntu ïa ki ban hikai bad pynmlien ban ïalehkai bad kilanmet borabor bad ban kiar na kaba pyndonkam ïa ki jingdih pynbuaid kiba lah ban pynsniewdur ïa ka jinglong jingim jong ki.
U bah Carness u la pynkynmaw ruh ba kum ki khynnah skul ki dei ban long kiba minot, kiba trei shitom, kiba tista bad kiba kit khia ha kano kano ka kam kaba ki ki trei bad ban ym pynsepei ïa ka por ha ka jingpule. U la bynrap ruh ba ha kano kano ka thong kaba ki ïaleh kin don beit kiba shah rem bad kiba jop, hynrei lyngba kane u la ai mynsiem bad pynshlur ïa kiba jop ba kin nangïaid shakhmat bad kiba rem ruh ba kim dei ban noh ne duh mynsiem hynrei ban ïai pyrshang ban ïoh kheit ïa u soh jong ka jingjop.
Namarkata, u la ïaroh ïa kiba jop da kaba ong ba lyngba kum kine ki jingïalehkai, ki khynnah ki ïoh ban pynpaw ïa ki sap ki talent bad ban pyndonkam ha ka rukom kaba dei bad khmih lynti ruh ba kane ka distrik kan nang pynmih shuh ki ‘rang bad ‘thei kynsai ki ban wanrah ka nam ka burom ïa ka dong ka thaiñ lyngba kum kine ki rynsan ïalehkai bad ban long ka nongmuna ïa kiwei bad ban rat dyngkhong ïa baroh ki jingsniew kiba don ha ka imlang sahlang.
Ha kaba kut ha shwa ban khylliap noh ïa ka lama u la kyrkhu kyrdoh ba kin nang kiew shaphang ha ki jingpule bad ka jingïalehkai bad khmih lynti ba shisien ka sngi kin mih shuh bun ki khlur kiba paw ki ban tyngshaiñ ym tang ha ka dong ka thaiñ hynrei ki ban wanrah burom ïa ka ri bad jaidbynriew baroh kawei.
U bah S.C. Laloo, MSC, ADC, South West Khasi Hills District ha ka jingkren jong u pynpaw nyngkong eh ka jingainguh ïa U Blei U ba la don ryngkat bad ngi iwei pa iwei wat la hapdeng jong ka jingpynwit jong u slap ha ki por mynstep, hynrei da ka jingisynei jong U U la plie ka lad ban ïoh ban pyndep ïa ki baroh ki bynta ba kum ka ophis jong u DSO ka don ban thmu. Ha kajuh ka por u la pynkynmaw ruh ba balei donkam ban don ki jingïalehkai? Ka long namar ban don ka mynsiem jong ka jingïashimbynta, ymdei eh ka mynsiem ban jop ne ban noh mynsiem lada shah rem hynrei khamtam eh ban don ka mynsiem ban kwah ïa mihshakhmat ha bynta bapher bapher lyngba ka jingïashimbynta (spirit of participation).
“Lyngba ka jingmih shakhmat jong ki khynnah skul ha ki kam ïalehkai, kan ai bad kan ïarap ïa ka jabieng, ka jingmut jingpyrkhat, ka met ka phad kaba koit kaba khiah”, ong u bah Laloo. Namarkata, ka jingïashimbynta jong ki khynnah skul kan long ruh ka jingai mynsiem na ka bynta ka ophis jong u District Sports Officer ba kan nanglah ban ïai pynlong ïa kum kine ki jait jingïalehkai ha ki snem ki ban wan ruh ha kaba ki khynnah kin nang lah ban ïai kilanmet manla ka sngi bad pynpaw ruh ïa ki sap ki phong ba ki ki don.
U la ong ruh ba ki khynnah skul ki im ha kane ka juk jong ka jingïakhun ne competition, kumta ka long kaba donkam kin nangtrei shitom ym tang ha ki kam ïalehkai hynrei khamtam eh ka pule puthi khnang ba kin nang kiew na kawei ka kyrdan sha kawei pat.
U bah Damang Syngkon, District Sports Officer, South West Khasi Hills District u la ai ki kyntien ai khublei na ka bynta baroh ki nongïashimbynta bad kumjuh ruh ïa ki ophisar sorkar kiba la wan sakhi ha ka sngi ba sdang bad kumjuh ruh ha kane ka sngi ban pynhap pyrda ïa kane ka 8th South West Khasi Hills District Level Inter-School Athletic Meet 2022.
Ha kane ka sngi la sam ruh ïa ki khusnam sha ki nongïalehkai kiba tbit kita ki long ha ka karta ba 14 snem jong ki shynrang ki long u Jobatstar Kharlyngdoh jong ka Mawrwangkynda Church of God Secondary School bad ka Latympang Lyngdoh Marshilong jong ka Nativity Higher Secondary School jong ki kynthei. Ha ka karta ba 16 snem ki long u Bajoplang Sohshang jong ka Nativity Higher Secondary School na ka liang ki shynrang bad ka Badaphun Nongrem jong ka Nativity Higher Secondary School jong ki kynthei. Nangta, ha ka karta ba 18 u Batskhemlang Thongnirit jong ka Nativity Higher Secondary School na ka liang ki shynrang katba ka Ibanrisha Kharwanniang jong ka Jakrem Presbyterian Higher Secondary School na ka liang ki kynthei.
Hadien ba la pyndep ïa baroh ki bynta, u kongsan u la ai ka jingpynbna ba ka ïa ka 8th South West Khasi Hills District Level Inter-School Athletic Meet 2022 la pynkut noh mynta ka sngi ka 13 tarik u Jymmang, 2022.