Shillong, Jylliew 11 : Ka Jylla Meghalaya kan sa ïoh ban pynlong ïa ka lympung ïalehkai kynjat bol ba la rim tam hapoh ka dewbah Asia ka Durand Cup kaba 132 (132nd Durand Cup), hadien ba ka Local Organizing Committee (LOC) jong katei ka tournament ka la pynbna ïa ka nongbah Shillong, Meghalaya nalor ka Sir Kokrajhar ha Assam kum ki jaka ïalehkai phutbol ba thymmai na bynta ban pynlong ïa kane ka lympung ïalehkai kynjatbol kaba paw bha jong ka ri India.
Katei ka lympung kan neh shi bnai thik kaban sdang naduh ka 3 tarik Nailar haduh ka 3 tarik Nailur 2023.
Ha ka samoi kaba lah dep jong katei ka lympung kaba 131, ka kynhun ba la ïalam da u kapten kynsai ka ri India u Sunil Chhetri ka la ïoh ban rah ïa ka nam lahduh, hadien ba ka Bengaluru FC ka la pynliem noh ïa ka Mumbai City FC da 2-1 kol ha ka jingïalehkai phainal kaba la long ha Vivekananda Yuba Bharati Krirangan (VYBK), Kolkata. Kadei ruh ka sien ba nyngkong ba ka Bengaluru FC ka ïoh ban rah nam lahduh jong ka Durand Cup.
“Ka Durand Cup ka long ka lympung ïalehkai kynjat bol kaba la palat spah snem ba ki tnad shipai ki ju pynlong ïa ka. Kumba ngi la dep ban pynbna ha u snem ba lah dep ba ngi kwah ban pynïar ïa kane ka jingïalehkai kynjat bol ha ka thaiñ shatei lam mihngi bad mynta u snem ngin sa pynlong ïa kane ka lympung ïalehkai ha nongbah Shillong bad ha Kokrajhar,’ ong u Lt. Gen. R.P. Kalita PVSM, UYSM, AVSM, SM, VSM, General Officer Commanding in Chief (GOC-in-C) ka Eastern Command.
U la ong shuh shuh ba ïa kane ka jingthmu ban pynurlong kadei ka jingïatreilang lang na ka sorkar jylla Assam bad ka jylla Meghalaya. U la ong ba ka sorkar jong ka jylla West Bengal ka la ju ai ka jingkyrshan naduh ba lah sdang kane ka lympung ïalehkai kaba nyngkong eh.
Nalor ba la pynbna ïa kine ki ar tylli ki jaka ïalehkai kiba thymmai, ha ka Durand Cup kaba 132, la kynthup langr ruh ïa ka club ïalehkai phutbol kaba pawnam bha na ka thaiñ shatei lam mihngi, ka Shillong Lajong Football Club ka ban ïashim bynta ha kane ka lympung ïalehkai ha ka sien kaba nyngkong eh bad ha ryngkat lang bad kiwei ki club.
Ka samoi ïalehkai ba mynta jong ka Durand Cup kan sa khring bun ïa ki paidbah nongwan peitkai ha kaba kane ka lympung kan long biang ha ka sien kaba ar naduh ba la wan lyngshop ka khlam Covid-19. Ïa ka Durand Cup kaba 132 yn sa pynïalehkai ha ki saw tylli ki madan ba kynthup ha Kolkata, Guwahati, Shillong bad ha Kokrajhar.
