Shillong, Naitung 11 : Ka Shillong Lajong FC ka la mad ïa ka nam jop ha ka sien ba nyngkong eh ha ka lympung ïalehkai OC Blue Shillong Premier League 2021-22 hadien ba ka la pynliem noh da 2-1 pyrshah ïa ka Mawkhar SC ha ka jingïakhun ha ka sngi Nyngkong ha madan Third Ground, Polo, Shillong.
Shwa ban mih madan kine ki ar tylli ki team ki kamai mar shi point, hynrei ka Shillong Lajong ka don ha ka kyrdan ba hynñiew na ka jingïapher thep kol. Haba phai sha ka jingïakhun, ka Shillong Lajong FC ka la pynkhlaiñ ka kynhun jong ki 11 ngut da kaba pynkylla ha ka rukom pynmih madan ïa ki rangïalehkai, hynrei ka la pynshaïong khyndiat ïa ka kynhun hadien ba u Samuel Vanlalpeka uwei na ki player ba thymmai ba mih madan ha ka thup ki 11 ngut u la ïoh pdiang ïa ka yellow card na ka jingïalymbub bad u rangap kol ka Mawkhar u Widenstar Kharsati.
Ka Shillong Lajong ka la don hapdeng ka jingma hadien ba u Ahlawat u la ïoh pdiang syndon ïa ka red card naba pynur ïa u rangïalehkai ka Mawkhar hapoh box ha ka jingïalehkai jong ka kylla miet.
Ka Shillong Lajong ha ka jingïalehkai jong ka kylla step ka la ïakhun tyngeh bad ïoh ruh ka kabu ban pynkhih jar ha ka minit ba 21 hynrei ka bol ba la shut da u Sangti Janai Shiang-long ka la tam noh ïa u dieng kol.
Ka kol kaba nyngkong ha kane ka jingïalehkai ka la wan ha ka minit ba 28 lyngba u Ryngkhlem uba la ïoh ban khyrwit tyngeh na kyndong u dieng kol kaba la rung beit jlang shapoh kol.
Tang hadien khyndiat minit ba la sdang biang ka jingïalehkai ka Shillong Lajong ka la ïoh biang sa hi kol ba la thep da u Aman Ahlawat ha ka minit ba 34 ha kaba ka kynhun ka la nang ïoh mynsiem.
Ka jingïalehkai ka la nang ïakhluit ha baroh arliang ha kaba ka Mawkhar ruh ka khlem ailad bad ïakhun beit triang ban pynphai kol hynrei haduh kaba kut jong ka kylla step ka khlem lah ban pyndep ha ka liang ka thep kol ha kaba ka Shillong Lajong FC ka la lamkhmat da 2-0.
Haba wanphai sha ka kylla miet, u Bansanbha u la ïoh kawei ka kabu na bynta ka Mawkhar hadien ba u la khyrwit ïa ka kol kaba la leit dei noh ïa u dieng kol ha ka minit ba 48.
Ka Shillong Lajong ruh ka la bteng ban ñion shakhmat da ka thong ban thep kol, hynrei bun tylli ka la pynlehnoh ei ïa ki kabu ksiar. Ka kabu kaba biang bha na bynta ka Mawkhar kadei ha ka minit ba 85 ha kaba ka bol ba la shut da u Bansanbha u rangap kol ka Shillong Lajong u la ïoh ban kyrda noh.
Ha ka jingïalehkai kaba ïakhluit bha, ka Shillong Lajong ha ka jingïakhun ba la jan kut artad ka la hap ban ïalehkai tang 10 ngut ha madan hadien ba u Ahlawat u la shah beh syndon na madan na ka jingïoh pdiang ïa ka red card. Bad dei ha kane ka por ka Mawkhar ka la ïoh ban pynphai shi kol hadien ba u Balajied Syiemlieh uba la wan ban bahkhlieh ïa ka penalty u la pynrung suk ïa ka bol shapoh jar.
Hynrei namar ba ka por ka la lyngkot palat, ka Mawkhar SC kam shym la lah shuh ban pynphai kol ha kaba ka Shillong Lajong ka la jop da ka said da 2-1 kol.
Lyngba kane ka nam jop ka Shillong Lajong FC ka la lait na ka kyrdan jingshah pynhiar kyrdan bad kiew sha ka kyrdan ba hynriew da kaba khur saw point. Ka Mawkhar na ki sansien ïakhun ka jop shisien, ïakhaid shisien bad rem laisien katba ka Mawkhar ka don ha ka kyrdan ba sha trai duh da 1 point. Ha ki sansien ka rem saw sien bad ïakhaid shisien.
Ka jingïalehkai mynta ka sngi ba ar kan long hapdeng ka Nangkiew Irat SC pyrshah ïa ka Rangdajied United FC ha ka por 4 baje janmiet.
