Shillong, Risaw 07: Ka kynhun ki samla nurse ba pass ïa ka written test ba pynlong da ka Meghalaya Medical Service Recruitment Board dang shen, ki la ai ka jingïaroh ïa ka sorkar jylla kaba la lah ban pynmih ïa ka result kaba don lang bad ka jingïoh mark.
Lah ban kdew hangne ba ha ka 28tarik jong u bnai ba la dep ka tnad ka Koit ka Khiah ka la dep ban pynmih ïa ka result ban pyndap ïa ki 164 tylli ki kam staff nurse bad 78 tylli ki kam ANM kiba lait.
Haba kren bad ki lad pathai khubor ha Shillong Press Club ha ka Sngi Nyngkong, u ka samla Mery Marbaniang ka la ong ba ki kyntu ïa ka tnad ka Koit ka Khiah jong ka sorkar jylla ba kin pynstet ban khot noh sa ïa ka Physical Verification.
“Ngi ki samla ba pass ïa ka eksam katkum ka result ba pynmih ha ka 28tarik u Nailur ngi dawa na ka MMSRB ban ym pynslem shuh ïa ka Physical Verification,” ka la ong.
Shwa kane, u Samla Ïaishem Wankhar u la pynpaw ba kum ki samla kiba la pass ïa katei ka eksam kim don ei ei ban ong ïa kawei pat ka kynhun jong ki nos kiba pyrshah. “Ngi la trei shitom ban pass ïa kane ka eksam bad ngi dei ruh ban sngewthuh ba ka eksam ka long kaba eh,” u la ong.
Ki la ong ruh ba kane ka eksam kadei kaba la pynlong da kaba khuid namar ki la don wat da ki nongring video ha ka por ba don ka eksam ruh. Kane ka kynhun ki nos ba pass ïa ka eksam ki la ong ruh ba kane kadei ka sien kaba nyngkong eh ba ka tnad kan pynbna lut ïa ka result ha ryngkat ki kyrteng bad ka jingïoh mark jong baroh kiba ïakhun ïa katei ka eksam kam nurse.
