Siat tear gas ki Pulit ïa ki Nonghikai skul kontrak hakhmat Secretariat, mynsaw 5 ngut, kham shitom u Babu Birbor

Shillong, Risaw 06: Ka jingïakhih ba jai jai ki Nonghikai Kontrak kaba la neh ka jan shi bnai ha u Mot Kiang Nangbah, haba ki Pulit ki la pyndonkam da ka bor bad siat ruh da ki bomb tear gas lane ki lyer pynsat khmat ïa ki nonghikai kiba la tur sha Secretariat ban dawa ïa ka hok jong ki.
Kane ka jingsiat tear gas ïa ki nonghikai ka la jia haba kane ka jingïakhih ki nonghikai la don lang ki khun ki kti jong ki kiba dang rit ruh. Kane ka jingsiat lyer pynsat khmat kaba la mih da ka tdem kaba sat, ka la pynlong ïa ki nonghikai ban ïaphet kulmar, khamtam ki kynthei. La ïohi ruh ba bun ngut ki nonghikai ki la ïam namar ka jingkyndit bad ka jingtieng bad ka jingsat khmat.
Hynrei hapdeng ka jingshah thombor ki nonnghikai kiba la shah weng kam noh na ka sorkar namar ka jingbym lah ban pass ïa ka eksam MTET, wat lada bun napden jong ki, ki la hikai bun snem, pynban ki la ïoh ban shong ha khyrdop jong ka Secretariat bad siang da ka plastik. Haduh ba thoh ïa kane ka khubor, kine ki nonghikai ki dang shong ha katei ka jaka.
Ha kane ka jingsiat lyer sat khmat ki Pulit, kumba 5 ngut ki nonghikai ki la mynsaw khamtam u Babu Birbor Riangtem, uba la shong ïakhih naduh ba sdang, u la ïap ler shiphang bad mynta u la tlot ïar bad um lah wat tang ban ïeng ruh.
Ki paidbah kiba la ïohi ïa kane ka jingjia bad kiba ïohi lyngba ki khubor Youtube bad kiwei de ki lad khubor ki la pynrem jur ïa kane ka jingleh ka sorkar bad khamtam eh ïa ka jingleh maiñ ki Pulit kiba ym shym la kheiñ shuh wat ïa ki khunlung ki khynnah.
Ka Voice of the People Party (VPP) ha ka kyrwoh ba la phah da u Dr. Ricky Syngkon, General Secretary jong ka Seng, ka la pynrem jur ïa ka jingleh donbor bad ka jingpyndonkam palat pud ki bor sorkar ïa ki Pulit ha ka jingïakhih ki nonghikai kontrak kiba la ïakhih mynta la bun bun sngi ban dawa ïa ki hok jong ki.
Ka Seng ka ong ba, ha kaba ba nyngkong ka sorkar ka la rai da kaba shai ba kan nym pdiang shuh ïa ki jingdawa jong ki da kaba knieh kynthet noh ïa ka jakpoh jong ki, kaba long ka jingthombor ïa kita ki nongtei jong ka ri bad ka jaidbynriew.
Kaba ar, ka sorkar ka la pheil ha ka jingtreikam jong ka, namar kam shym la wanrah da kiwei pat ki lad ki lynti kumno ban ïarap ïa kine ki nonghikai, hynrei la shu pynbor ïa ki ba kin mih beit sha ka surok.
Ka VPP ka la ther ruh ïa ka jingleh heh ki Myntri Sorkar, da kaba ong “Lada u Myntri Rangbah, u Myntri Rangbah Synbud bad kiwei kiwei ki Myntri ki lah bad don por ban leit shang sha bar ri, balei kim lah ne don por ban ïakren ne ïakynduh ia ki nonghikai”.
Kaba khatduh eh, ong ka VPP, kane ka sorkar khawpud, ka la sah ïa u prek ba khatduh jong ka synduk met ïap haba ka la siat da ki bom tear gas ne ka lyer pynsat khmat ïa ki nonghikai la kum ba dei kita ki nongpynkulmar shnong.
U Myntri ka tnad pule puthi bad ka tnad pohïing udei ban shim ka jingkitkhlieh bad hiar shuki noh mardor. Ki Pulit kiba la pyndonkam bakla ïa ka bor ruh dei ban shim jingpynshitom namar ki la pynkheiñ ia ka aiñ.
Kane ka jingleh mynta ka sngi da kane ka sorkar leh donbor, ka sorkar bamsap dei ban pynrem da baroh kiba dang don ka mynsiem ïatip leh ha ka imlang sahlang bad ka longbriew man briew.