Siang rong torti ïa ka surok PMGSY na Photjaud – Mawbidong

Mawkyrwat, Lber 01: Ka Synjuk Rangbah San Shnong Manad Area kaba kynthup ïa ki 5 tylli ki shnong ka Pyndenlyngdoh, ka Pyndensohlang, ka Manad, ka Mawbidong bad Lummawbah ki la pynpaw ïa ka jingbym sngewhun halor ka jingpyntrei ïa ka surok Pradhan Mantri Gram Sadak Yojana (PMGSY) na Mrl46-Photjaud sha Mawbidong kaba dei 5.50 Kilometer ha ka jingmang pisa kaba 6.63 klur bad haduh mynta ka dang ïaid shaid – shaid ïa ka jingpyntrei ïa ka jingsiang rong.
U President ka Synjuk Rangbah San Shnong Manad Area, u bah Redy Shylla haba kren ha ki lad pathai khubor u la pynpaw ïa ka jingsngewkhia bad jingbym sngewhun ïa ka jingsiang rong ïa kane ka surok PMGSY kaba dei na Mrl46-Photjaud sha Mawbidong. Ym tangkata, ula ïathuh ruh ba kum ka synjuk ka la lap ba ki nala kim biang kumjuh ruh ki kynroh surok bad ka rukom siang rong kam da biang namar ki don ki jaka ki bym skhem bad pdang.
Shuh shuh u bah Redy Shylla ula ïathuh ruh ba kane ka surok ka khlem poi haduh kut shnong Mawbidong katkum ka bhah ba la mang.
Namar kata, ka Synjuk ka kyrpad ïa ka ophis u Executive Engineer ka PWD (Roads) ba ka dei ban da wan khmih bad wan jngoh da la ki khmat halor kane ka jingpyntrei ïa kane ka surok, ban ïa pynbeit lang bad ki paidbah jong ki 5 shnong khnang ba kane ka surok kan long shisha ka surok kaba neh bad ka ban ai jingmyntoi ïa ki paidbah jong kane ka dong ka thaiñ.